iklan

COVALIMA, HEADLINE

Komunidade afetada ba perfurasaun posu Feto Kmaus rekomenda pontu balun ba Timor Resources

Komunidade afetada ba perfurasaun posu Feto Kmaus rekomenda pontu balun ba Timor Resources

Jerente Timor Resources, Filomeno Andrade. Foto/Celestina Teles.

COVALIMA, 23 Abríl 2024 (TATOLI) – Rezultadu diálogu entre komunidade afeitada ho empreza pertolífera Timor Resources rezulta pontu balun ba perfurasaun posu foun Feto Kmaus-Karau ne’ebé lokaliza iha área Igreja Ave Maria Suai nia oin, iha suku Debos, postu Suai.

Rekomendasaun sira ne’e mak komunidade aseita atu halo perfurasaun, kria empregu, lahalo indemnizasaun, aluga rai, no hafoin perfurasaun termina komunidade fila bá hela fali iha sira-nia fatin.

“Posu mina ne’ebé atu halo tan perfurasaun, ami hala’o sorumutu ho komunidade no sira prontu atu entrega fatin ba empreza atu halo perfurasaun, maibé komunidade afetada mós hato’o sira-nia rekomendasaun ba Timor Resources molok hala’o atividade perfurasaun”, Jerente Timor Resources, Filomeno Andrade, hateten ohin.

Nia dehan, Timor Resouces mós hasoru malu ona ho ekipa interministeriál hodi halo ona levantamentu dadus, hafoin nia rezultadu ne’e empreza relata ba Autoridade Nasionál Petróleu (ANP).

Iha sorin seluk, Diretór Terra no Propriedade  Covalima, Carlos Caetano, hateten ekipa interministeriál ne’e kompostu husi Terra no Propriedade Covalima, Ministériu Obra Públika (MOP), Ministériu Turizmu no Ambiente, Polísia Nasionál Timor-Leste (PNTL) no autoridade lokál hodi halo levantamentu dadus ba komunidade afetada ba perfurasaun posu Feto Kmaus.

“Levantamentu dadus durante loron rua ne’e ita identifika rai Estadu abandonadu no rai privadu, nune’e bele uniformiza dadus no Timor Resources submete ba Ministériu Petróleu hodi hetan desizaun no orientasaun kona-ba prosesu perfurasaun, oinsá atu fó indemnizasaun ka ajuda ba komunidade afetada direta ba prosesu perfurasaun posu Feto Kmaus”, nia dehan.

Rezultadu levantamentu dadus identifika parsela rai 31, hosi númeru ne’e 23 kategória rai privadu no ualu rai abandonadu ne’ebé na’in-neen ativa selu arrendamentu no rua la selu taxa ba Estadu.

Lembra katak perfurasaun ba posu Karau-1/Feto-Kmaus-1 hala’o iha 25 Outubru 2021, maibé empreza australiana Timor Resources deside taka iha dezembru tinan hanesan tanba bazeia ba teste laiha valór komersiál.

Depois ida ne’e, empreza petrolífera ne’e halo preparativu hodi hakat ba perfurasaun posu foun ne’ebé lokaliza iha munisípiu referidu hodi konfirma deskoberta mina ne’e iha valór komersiál hodi halo preparativu hotu hodi bele halo perfurasaun konfirmasaun, nune’e mós peskiza ne’ebé mak sira planeia ona iha 2024.

Notísia relevante: Timor Resources diálogu ho komunidade afetada ba perfurasaun posu Feto Kmaus

Jornalista: Celestina Teles

Editora: Maria Auxiliadora

iklan
iklan

Leave a Reply

iklan
error: Content is protected !!