MANUFAHI, 24 abríl 2024 (TATOLI)-Governu liuhosi Ministériu Komérsiu no Indústria (MCI, sigla portugés), halo abertura ba feira hodi komemora loron restaurasaun independénsia ba dala-22 (20 maiu 2002-20 maiu 2024), iha Munisípiu Manufahi.
Feira ne’e ho tema ‘Hamutuk ho Dame Promove Produtu Nasionál’, ne’e sei realiza iha Kampu Munisipál Futebol, Manufahi. No abertura hosi Ministru Komérsiu no Indústria, Filipus Nino Pereira.
Tanba ne’e, Vise-Ministru Komérsiu no Indústria, Augusto Junior Trindade, hamutuk ho ekipa, kinta ne’e halo observasaun direta ba fatin preparasaun feira referida. Alende feira iha mós atividade sosiál seluk hanesan jogu tradisionál, no seluk-tán.
“Ohin, ita mai iha Manufahi atu haree preparasaun ikus, nune’e Ministru Komérsiu no Indústria, Filipus Nino Pereira, bele halo abertura atividade ne’e. Preparasaun dadaun ne’e atinji ona 95%”, Augusto Junior Trindade hateten ba jornalista sira, iha Kampu Munisipál Futebol, Manufahi.
Empreza hamutuk 30-resin, hanesan Ezato Foods, Café Group, Soru Tais, Grupu Kripik, Giancarlo Resto, Fitun Kablake, no seluk-tán mak sei promove sira-nia produtu lokál. Produtu lokál ne’ebé sira sei promove hanesan hudi advokate, kafé, mina-nuu, koto, sabraka, akar, tais, artezenatu no hahán trasionál.
Vise Ministru dehan, nia informa ona bá Sekretária Planeamentu Investimentu no Dezenvolvimentu Integradu Manufahi atu envolve mós grupu kulináriu sira iha atividade ida ne’e, hanesan ho grupu kulináriu sira iha Bobonaro, Covalima, Baucau no Lautém
Iha fatin hanesan, Sekretária Planeamentu Investimentu no Dezenvolvimentu Integradu iha Manufahi, Filomena da Costa Nunes, agradese ba Ministériu Komérsiu no Indústria ne’e iha inisativa realiza eventu referidu.
Tuir nia, autoridade munisipál informa ona líder lokál sira hotu atu mobiliza populasaun sira hodi mai partisipa iha atividade ne’e.
Governu aloka osan hamutuk rihun $700 ba eventu feira nasionál, ne’e hala’o durante loron-41, iha territóriu, enkuantu iha Dili hahú iha loron 15 to’o 20 fulan-maiu.
Notísia relevente: MCI husu Empreza Bee Leste atu partisipa iha feira nasionál
Jornalistaː Domingos Piedade Freitas
Editoraː Isaura Lemos de Deus
