DILI, 24 Abríl 2024 (TATOLI) – Servisu Agrikultura Munisipál Aileu halo ona identifikasaun hodi tau iha programa munisípiu nian atu konstrui tan irrigasaun haat hodi fornese bee ba natar sira.
Irrigasaun haat ne’e sei harii rua iha suku Liurai no rua seluk iha Suku Fahiria, maibé sei fó prioridade uluk ba irrigasaun ida iha suku Liurai.
“Ha’u halo ona identifikasaun no ha’u hatama ona iha planu no programa munisípiu nian. Ita presiza tan irrigasaun haat iha Aileu, nune’e bele fornese tan bee ba natar sira iha suku rua ne’e. Daudaun, Aileu iha ona irrigasaun ida iha Simhati ne’ebé fornese ona bee ba natar ektare 40 iha Aileu Vila”, Diretór Servisu Munisipál Agrikultura Aileu, Pedro da Silva, dehan iha Comoro, ohin.
Tuir nia, irrigasaun ne’ebé iha ona ne’e presiza atu konstrui halo di’ak tanba volume mota boot demais, entaun lori rai-henek barak halo nakonu ona iha irrigasaun laran.
“Ita tau uluk prioridade ba irrigasaun iha suku Liurai, tanba ita konsidera emerjénsia duni. Tanba ne’e ita halo ona estimativa fundu ba irrigasaun suku Liurai ho totál rihun $400”, nia informa.
Husi dadus irrigasaun ne’ebé ekipa sira rekolla ona, Servisu Munisipál submete, iha tempu badak, ba Diresaun Nasionál Irrigasaun hodi hetan konsiderasaun no ba irrigasaun tolu seluk, diresaun sei rekolla hela dadus depois maka submete mai nasionál hodi hetan mós konsiderasaun.
Nune’e mós, Diretór Nasionál Agrikultura, Kafé no Planta Industriál, Martinho Laurentino Soares, haktuir katak Servisu Agrikultura Munisipál nian papél importante atu alista dadus sira kona-ba irrigasaun sira maka hetan ameasa ka danu, nune’e bele tulun Ministériu Agrikultura hodi tau iha planu sira.
“Ita konsidera irrigasaun sira ne’ebé hetan ameasa tenke hadi’a, nune’e natar sira bele hetan fornesimentu bee ho di’ak hodi hasa’e produsaun hare iha país ne’e”, salienta.
Tuir dadus ministériu, totál irrigasaun ne’ebé eziste iha Timor-Leste hamutuk 27, husi númeru ne’e 11 mak hadi’a ona liuhusi Programa Nasionál ba Dezenvolvimentu Suku no husi parseiru sira hanesan Ajénsia Kooperasaun Internasionál Japaun, Departamentu Negósiu Estranjeiru no Komérsiu Austrália no seluk tan.
Notísia relevante: Servisu Agrikultura Aileu rekolla ona dadus kona-ba produsaun hare no batar
Jornalista: Tomé Amado
Editora: Maria Auxiliadora
