DILI, 24 abríl 2024 (TATOLI)–Ministru Prezidénsia Konsellu Ministru ein ezersísiu, Adérito Hugo da Costa, aprezenta projetu proposta-lei ba autorizasaun lejizlativa kona-ba fiksasaun limite idade relasiona ho serbisu funsionáriu públiku no ajente administrativu sira.
“Projetu proposta-lei ne’e hetan apresiasaun no aprovasaun iha Konsellu Ministru. Objetivu husi projetu proposta-lei ne’e atu estabelese mekanizmu nesesáriu sira ne’ebé fó dalan atu promove profisionál joven sira iha administrasaun públika nasionál, hodi nune’e bele lori kompeténsia foun ba iha funsionalizmu públiku,” Adérito Hugo da Costa, relata hafoin reuniaun ezekutivu, iha Palásiu Governu, kuarta ne’e.
Renovasaun ba kuadru iha administrasaun públika ne’e nu’udar medida esensiál ida atu asegura melloria serbisu sira ne’ebé presta ba populasaun.
Notísia relevante : KFP sei aprezenta proposta-lei reforma obrigatóriu ba funsionáriu públiku
Governu nia objetivu ba projetu proposta-lei ida-ne’e mak atu Parlamentu Nasionál (PN) autoriza hodi fiksa limite idade ne’ebé fó kauza ba sesasaun relasiona ho serbisu iha administrasaun públika.
Nune’e, iha baze legál ne’e fiksa idade 60 ba reforma obrigatóriu, tanba rejime ne’ebé eziste durante tinan barak nia laran la’ós obrigatóriu, katak idade 60 bele hala’o serbisu hela no bele hala’o rekerimentu atu reforma.
“Intensaun ida atu fó espasu ba rekrutamentu funsionáriu públiku atu dedika sira-nia serbisu iha administrasaun públika,” nia tenik.
Diskusaun no aprezentaun iha reuniaun konsellu ministru ne’e marka mós prezensa husi estrutura Komisaun Funsaun Públika (KFP).
Bazeia ba dadus, KFP rejista funsionáriu públiku permanente hamutuk 37.000, ne’ebé husi númeru ne’e, funsionáriu idade 60 iha 4000-resin. Funsionáriu 2000 husi Ministériu Edukasaun hanesan manorin-na’in.
Jornalista : Antónia Gusmão
Editora : Julia Chatarina
