ERMERA, 26 abríl 2024 (TATOLI)– Xefe Unidade Eletricidade de Timor-Leste, Empreza Públika (EDTL, E.P), Assunção Pinto Baptista, hateten, iha fatór tolu mak afeta hodi eletrisidade mate-lakan iha munisípiu Ermera durante ne’e.
“Ami rejista problema bo’ot tolu kauza ahi mate-lakan iha Ermera hanesan, distánsia liña eletríka ne’ebé do’ok ne’ebé husi Kamea- Dili, mai to’o iha Ermera, hafoin distribui fali-tán to’o postu administrativu sira, hanesan Atsabe, Ermera Vila, Hatulia, Letefoho, no Railaku. Alende ne’e, ai-samatuku bo’ot monu no hanehan fiu, no problema seluk mak to’o agora seidauk troka ai-rin eletrisidade ne’ebé antigu ona desde okupasaun Indonézia nian”, Xefe Unidade EDTL Ermera hateten ba jornalista-sira, iha postu administrativu Gleno, munisípiu Ermera, sexta ne’e.
Tanba ne’e, ekipa EDTL halo ona levantamentu dadus ba ai-rin eletrisidade antigu sira hodi bele solusiona problema ahi mate-lakan iha munisípiu referidu.
Responsável ne’e mós husu kontribuisaun husi populasaun sira hodi tesi-ai sira ne’ebé monu no hanesan fiu eletrisidade, hodi nune’e parte kompetente bele aselera troka ai-rin antigu sira hodi evita ahi-mate lakan beibeik.
“Ami mós rekoñese linã eletridade ida ne’e esensiál tebes ba sentru saúde, sé ahi mate-lakan bele prejudika atendimentu ba pasiente sira. Maibé, ida ne´e situasaun no kondisaun ne´ebé ita hasoru durante ne’e”, nia dehan.
EDTL Ermera iha funsionáriu hamutuk na’in-30, kompostu hosi feto na’in-tolu no mane 27. Mesmu nune´e, rekursu umanu seidauk sufisiente hodi kobre to’o suku no aldeia.
Iha fatin hanesan, Bendita de Jesus, ábitante hosi munisípiu Ermera, preokupa tanba ahi mate-lakan bele estraga sasán elektróniku sira.
“Ahi mate iha munisipiu Ermera bele to´o oras ida ka rua, depois dala-ruma iha tempu kalan. Sé eletrisidade mak kontinua mate-lakan hanesan ne´e, ninia konsekuénsia halo ema nia sasán sira a’at hotu’’, nia lamenta.
Nune´e mós, Prezidente Autoridade Ermera, José Martins dos Santos akresenta, problema ahi mate-lakan ne’ebé sai preokupasaun povu Ermera nian hato’o ona ba EDTL munisipál no nasionál hodi solusiona lalais.
“Ami-nia preokupasaun bo’ot liu mak kona-ba eletrisidade. Populasaun barak mak hato’o keixa oioin mai ha’u atu halo intervensaun ba funsionamentu eletrisidade, tanba ahi mate-lakan estraga populasaun nia sasán eletrónika sira’’, tenik nia.
Notísia relevante: PN husu MOP solusiona problema ahí mate-lakan
Jornalista: Domingos Piedade Freitas
Editora: Isaura Lemos de Deus
