OÉ-CUSSE, 30 abríl 2024 (TATOLI) – Autoridade Rejiaun Administrativa Espesiál Oé-Cusse Ambeno (RAEOA), tersa ohin, hala’o enkontru harii komisaun organizadora ba lansamentu voo dahuluk aviaun Aero Dili iha Oé-Cusse, ne’ebe tuir planu sei lansa direita husi Primeiru Ministru, Kay Rala Xanana Gusmão iha iha loron 19 maiu 2024 ne’e.
“Enkontru ohin ne’e, tanba hetan orientasasaun husi Prezidente Autoridade, atu prepara lansamentu aviaun Aero Díli iha Oé-Cusse, sei halo iha loron 19 maiu 2024, sei lansa husi Primeiru Ministru iha Oé-Cusse,” Prezidenti Autoridade Interinu, Andre La’o, bá jornalista sira hafoin ramata enkontru iha salaun Gabinete Autoridade Oé-Cusse.
Notísia relevante:Tékniku Aero Díli halo avaliasaun ba risku no infraestrutura iha aeroportu Rota do Sândalo
Atuál Sekretáriu Rejionál bá Asuntu Administrasaun ne’e, informa, prezensa Primeiru-ministru iha Oé-Cusse mós atu partisipa iha loron restaurasaun 20 maiu, depoizde selebrasaun, sei selebra akordu kooperasaun asinatura akordu lubun ho parseriu investimentu sira, husi nivél nasionál no internasionál.
Ohin enkontru nível rejionál ho membru autoridade, asesór sira no tékniku sira husi aeroportu Rota do Sândalho, atu kontribui ideia, atu harii komisaun organizadora hodi organiza tanba eventu ne’e nasionál, ne’ebé lidera direita husi Primeiru-ministru, no mós sei partisipa husi lia-na’in suku 18 no populasaun sira atu mai asiste lansamentu ne’e, sei halo iha aeroportu Rota do Sandalho,” nia katak.
Iha fatin seluk, Jestór Sub-rejiaun Pante Makasar, Lorêncio da Cunha, orgullu, tanba dahuluk aviaun bo’ot bele voo bá iha Oé-Cusse no kontinua kedas ba Denpasar Bali Indonézia.
“Ha’u senti kontenti, sekuandu iha fulan-maiu ne’e ofisialmente atu lansa aviaun Aero Dili, mai Oé-Cusse, no ha’u rona mós sei bá Bali, ida-ne’e istória bo’ot bá Oé-Cusse, tenki kontenti tanba asesu bá Dili lalais de’it, depois to’o agora aviaun kuaze semana tolu ona la halo operasaun tanba dehan iha problema, maibé agora agradese ba Governu tanba bele buka dalan atu-bele halo fali operasaun,” nia orgullu.
Notísia relevante:Aero Dili troka aviaun ZEESM semo bá Oé-cusse
Entretantu, antes ne’e, Autoridade RAEOA, deside hapara movimentasaun aviaun ZEESM hodi submete ba prosesu investigasaun tanba identifikadu mosu irregularidade balun.
Nune’e Prezidente Autoridade RAEOA, Rogério Tiago Lobato, akompaña husi Ministru Transporte no Komunikasaun, Miguel Marques Gonçalves Manetelu, Diretór Ezekutivu Aero Dili, Lourenço de Oliveira ho Autoridade Nasionál Administrasaun Aviasaun Timor-Leste (ANAATL), liuhusi konferensia imprensa, informa katak atu solusiona konektividade aéreu nian durante aviaun ZEESM tama iha prosesu investigasaun, maka Aero Dili mak sei halo operasaun, ho rota Dili-Oé-cusse no Oé-cusse-Dili.
Notísia relevante:Rogério Lobato preokupa despeza no reseita husi operasaun aviaun ZEESM
Jornalista: Abílio Elo Nini
Editór: Rafael Ximenes de A. Belo
