DIT RAEOA-KOICA inaugura laboratóriu komputadór fasilita kursu gratuita
OÉ-CUSSE, 02 maiu 2024 (TATOLI) – Dili Institute of Tecnology Kampus Rejionál Oé-Cusse (DITKREO) hamutuk ho Korean International Cooperation Agency (KOICA), kinta ne’e inaugura sala laboratóriu komputadór atu dezenvolve abilidade estudante sira liuhusi kursu gratuita.
Notísia relevante: MESSK hahú monitoriza atividade letiva DIT Oé-Cusse
Diretór DITKREO, João Muni, agradese ba Governu Korea Súl liuhusi KOICA, tanba apoia voluntáriu hanorin kursu lian Korea, komputadór ho lian inglés, kompleta kedas ho fasilidade komputadór unidade 15, AC mákina no fasilidade seluk-tán.
“Ami sei kontinua ho jestaun no manutensaun fó oportunidade kursu komputadór ba komunidade, estudante ensinu sekundáriu no tékniku vokasionál iha Oé-Cusse, alin sira bom aproveita ho kursu komputadór iha DITKREO gratuita bele hakat mai rejista, tanba ne’e ha’u hakarak rekomenda ba Governu lokál RAEOA no ZEEDOA bele hametin relasaun di’ak ho KOICA, nune’e joven Oé-Cusse bele aproveita oportunidade ida-ne’e,” João Muni, ko’alia iha seremónia inaugurasaun ne’e.
Iha fatin hanesan, Diretora KOICA iha Timor-Leste, Hau Kang Yeon Hwa, espera estudante sira no foin-sa’e sira iha Oé-Cusse, sei utiliza laboratóriu ne’e ho di’ak nune’e bele dezenvolve koñesimentu barak liután no hasa’e abilidade estudante.
“Hau kontente hodi partisipa Volunteer on Site Project dahuluk hodi haforsa rekursu komputadór no inovasaun fasilidade edukasaun ba futuru dijitál iha DIT, ha’u hakarak kongratula DIT-KREO tanba nia laran-di’ak hodi suporta projetu ne’e, profesór, estudante, autoridade lokál no ema hotu tanba sira-nia kontribuisaun tomak, ha’u apresia tebes. Serimónia ohin labele selebra se la iha imi hotu nia apoiu,” nia orgullu.
Nune’e nia garante, ho apoia fasilidade informátika sira-ne’e, bele haforsa liután edukasaun ho kualidade ba estudante no fakuldade sira iha DITKREO,
“Laboratóriu komputadór ba foin-sa’e sira, uza teknolojia dijitál liuhusi projetu ida-ne’e, ami bele hametin estudante sira-nia kapasidade no fó oportunidade atu asesu ba laboratóriu ICT ne’ebé sira la presiza ba sidade seluk. Sira bele aprende no esperiénsia iha Oé-Cusse, tamba ne’e ami husu ba parte Governu atu tulun eskola ida-ne’e hodi oferese linha internet ne’ebé sei kontribui maka’as ba prosesu aprendizazen iha aula komputador nian.”
Vice-Koordenadór ZEEDOA, Regio da Cruz Salu, orgullu tanba liuhusi kooperasaun ne’e, bele tulun estudante sira hodi aprende kona-bá teknolojia nian.
“Serimónia ohin, marka no fó mensajen importante sein teknolojia ita izola ita-nia koñesimentu, tanba ne’e husu estudante sira, tenke aprende fasilidade ICT ne’e, atu bele lori biblioteka mundiál ne’ebé kualidade besik ho ita-nia sala aprendizajen, ha’u husu nafatin família boot DIT liu-liu iha Oé-Cusse, atubele ko’alia nafatin ho Governu, inovasaun ne’ebé ita presiza ba universidade ida-ne’e,”
Notísia relevante: Timor-Leste no KOICA formaliza ona akordu subvensaun públika millaun $6
Entretantu, DITKREO Oé-Cusse iha kursu rua, departamentu komputer Since no departamentu jestau jerál no daudaun ne’e akumula estudante hamutuk na’in-94 maka hala’o hela estudu.
Jornalista: Abílio Elo Nini
Editór: Evaristo Soares Martins
