iklan

POLÍTIKA

Governu komprometidu dezenvolve língua portugeza

Governu komprometidu dezenvolve língua portugeza

Vise-Ministru Asuntu Parlamentár, Adérito Hugo da Costa. Imajen Tatoli/

DILI, 06 maiu 2024 (TATOLI)-Vise-ministru ne’ebé trata asuntu Parlamentár, Adérito Hugo da Costa, lori Governu dásia kongratula ba loron mundiál Língua Portugueza ne’ebé komemora iha 05 maiu domingu horseik.

“Governu hato’o kongratulasaun ba loron mundiál Língua Portugeza, iha komemorasaun ne’e ita Timor-Leste hala’o kada tinan husi kedas tinan 2009 komemora ho maneira oioin ne’ebé koordena ho entidade oioin. Primeiru prezervasaun língua portugueza hanesan lian ofisiál iha Timor-Leste portugés ho tétun, no segundu mak kontinua dezenvolve língua portugeza iha territóriu nasionál Timor-Leste (TL) tomak, liuhusi iha polítika setór edukasaun oinsá ho prezervasaun no dezenvolvimentu ba língua portugés ba futuru,’’ Vise-ministru hato’o bainhira reprezenta Governu partisipa komemorasaun loron mundiál Língua Portugueza ne’ebé organiza husi Parlamentu Nasionál (PN), iha resintu Parlamentu segunda ne’e.

Governu hato’o apresiasaun ba órgaun soberania daruak ne’e, liuhusi reuniaun plenária ohin aprova votu kongratulasaun ba loron mundiál Língua Portugeza ne’ebé bankada parlamentár hotu kontinua reafirma importánsia língua portugueza ne’ebé hola parte identidade TL sai hanesan língua ofisiál TL ho tetún ne’ebé primeira asembleia konstituiente aprova tau iha konstituisaun.

No, Governu rejista rekomendasaun husi PN oinsá atu kontinua dezenvolve liután língua ne’e liuhusi iha polítika setór edukasaun.

“Iha Timor-Leste estatístika hatudu dezde desizaun asembleia konstituante tranforma portugués ho tétun hanesan língua ofisiál, ita halo levantamentu ba estatístika atual, númeru timor-oan ne’ebé ko’alia portugués to’o agora,’’nia dehan.

Pontu reflesaun hafoin tinan 20 implementa portugués ba medida prezervasaun no medida buka solusaun oinsá dezenvolvimentu ne’e bele susesu iha ita-nia rai, no liuhusi polítika nasionál iha setór edukasaun ita kontinua hahú husi inísiu iha ensinu báziku to’o iha ensinu superiór sira.

“Iha universitáriu sira ita agora ho aprezentasaun proposta-lei ensinu superiór mai Parlamenu Nasionál ne’ebé agora audénsia públiku atu obrigatóriamente ba ensinu superiór implementa língua portugés (iha ensinu), depois ita iha konsisténsia ba ensinu língua portugés ba oin,’’nia akresenta

Notísia relevante:https://tatoli.tl/2024/04/16/pn-sei-diskute-proposta-lei-baze-ensinu-superior-ho-karater-urjensia/

Iha sorin seluk, Reitór Universidade Nasionál Timor Lorosa’e (UNTL), João Soares Martins, hateten UNTL nafatin tau prioridade ba kursu lian portugés no ba oin sei sai hanesan sentru sertifikasaun ba lian portugés.

“Kuaze kursu iha UNTL maiória hala’o ho portugés no junta ho inglés, inklui iha departamentu portugés rasik, UNTL iha déver konstitusionál atu bele promove língua ofisiál,” nia akresenta.

“Prontu. Ha’u hanoin kahur ba kahur ne’e laiha problema, realidade akontese duni, maibé ita sempre ezije profesór sira tenke prepara matéria ho língua portugés.

Dosente UNTL lubun ida mak hasai doutoramentu, mestradu iha Portugál, Brazil ne’ebé sira ne’e iha kapasidade atu bele utiliza língua ne’e iha aula.

Enkuantu, tuir dokumentu programa Governu konstituisionál dásia ba mandatu tinan lima ne’ebé Ajénsia TATOLI sita katak, Governu dásia kontinua ho dezenvolvimentu husi kapitál sosiál ba iha setór edukasaun, no formasaun katak Governu sei hadi’a kualidade edukasaun no formasaun profisionál hosi asegura asesu ne’ebé hanesan ba populasaun timor-oan tomak iha área ensinu hotu-hotu.

Mak haforsa ka hametin kondisaun hodi implementa ensinu báziku ne’ebé vunerável, obrigatóriu no gratuitu ho kualidade ne’ebé di’ak duni. Ensinu báziku sei sai nu’udar sentru ida hodi aprende atu koñese, aprende atu halo, aprende atu moris ho ema seluk no mós aprende atu forma nia aan rasik. Iha idade ho tinan neen (6), labarik hotu-hotu sei hetan asesu ba ensinu báziku ida ho kualidade, ho akizasaun ba kompeténsia ne’ebé makaas iha matemátika no iha literasia iha lian (língua) ofisiál portugés no tétun, ho mós kompeténsia bázika iha lian inglés hanesan lian estranjeiru, nune’e mós kompeténsia iha valór fundamentál hosi identidade nasionál.

No, halo estudu no avaliasaun finanseira ne’ebé presiza hodi hahú prosesu atu loke eskola CAFÉ sira iha postu adminitrativu, atu promove di’ak liu koñesimentu ba língua portugeza liuhusi kualifikasaun ba manorin na’in timor-oan.

Notísia relevante:https://tatoli.tl/2024/01/15/me-hakarak-alarga-eskola-cafe-iha-munisipiu-tolu/

Jornalista:Nelson de Sousa

Editór: Rafael Ximenes de A. Belo

iklan
iklan

Leave a Reply

iklan
error: Content is protected !!