OÉ-CUSSE, 06 maiu 2024 (TATOLI) – Ministériu Saúde (MS) liuhusi Diresaun Nasionál Prevensaun Kontrolu Moras, sesaun Saúde Mentál, segunda ohin, hala’o orientasaun matadalan kona-bá jestaun klínika no tratamentu psikiatria ba profisionál saúde na’in-40 iha sub-rejiaun Pante Makasar, Rejiaun Administrativa Espesiál Oé-Cusse Ambeno (RAEOA).
Notísia relevante: Autoridade reativa atendimentu saúde iha Hospital Referál Oé-Cusse
Responsável Sesaun Saúde Mentál hosi Ministériu Saúde, Maria Ángela da Conceição Silva, informa, objetivu husi formasaun ida-ne’e, atu hasa’e profisionál saúde sira-nia koñesimentu no abilidade tékniku hodi fornese serbisu atendimentu no akonsellamentu ne’ebé kualidade ba ema moras mentál iha nível primária.
Nune’e mós bele promove serbisu mentál no asisténsia integrada ba komunidade ho tratamentu adekuada, tanba dadus provizóriu husi munisipíu 13 ba saúde moras mentál hamutuk 3.144, husi númeru ne’e Oé-Cusse rejista 116.
“Formasaun ne’e loron 10, ita hahú iha Pante Makasar, sei kontinua ba iha sentru saúde no postu saúde sira iha sub-rejiaun Oésilo Pássabe no Nítibe,” Maria Ángela Conceição Silva, iha otél Lifau, Oé-Cusse.
Iha biban ne’e, Psikiatra Doutór Gaspar Quintão, esplika durante formasaun loron rua iha Pante Makasar, ho matéria prinsipál sira ba diagnóstiku psikiatra, hanesan sijofrania, ansidade, depresaun no mós tentativu asidu bibi-maten.
“Ami espera katak, profisionál saúde sira iha Oé-Cusse bele ajuda halo tratamentu no diagnosa ba pasiente sira, enfrenta moras mentál, tanba tratamentu ne’e agora iha ona nia matadalan tanba ne’e ita mai atu halo sosializasaun, nune’e sira-bele kumpriende didi’ak atu la’o tuir matadalan daudaun ne’e iha ona,” nia espera.
Notísia relevante:Medikamentu ba saúde mental hahú disponivel iha SAMES
Sekretáriu Rejionál ba Asuntu Saúde, Luís de Jesus Neno, agradese tanba antes ne’e, Autoridade liuhusi serbisu saúde mak propoin ba Ministériu Saúde atu fasilita formasaun iha Oé-Cusse.
“Bele haforsa tan profisionál saúde sira, nune’e bainhira fila-fali ba serbisu fatin bele hatene ona oinsá deteta no oinsá bele fó tratamentu no halo preventiva ba moras mental ida-ne’e,” nia katak.
Notísia relevante: Autoridade ofisializa kompañia tolu apoia serbisu iha fasilidade saúde Oé-Cusse
Jornalista: Abílio Elo Nini
Editór: Evaristo Soares Martins
