DILI, 06 outubru 2022 (TATOLI)—Diretora Armazém Servisu Autonómu Medikamentu no Ekipamentu Saúde (SAMES), Saturnina Ximenes, informa daudaun estoke medikamentu tipu lima hanesan rispiradona, trifluoperazine, fluxetina, chlopromazina no carbamazepine, hahú disponivel atu halo tratamentu ba pasiente ho saúde mental.
“Ai-moruk saúde mentál horiseik ita hatama no ekipa sira halo ona inspesaun hotu, nune’e ami prontu atu halo distribuisaun ba fasilidade saúde sira hotu iha territóriu nasionál,” Diretora Saturnina ne’e hateten ba Agência TATOLI iha nia kna’ar fatin Kampu Alor, kinta ne’e.
Durante ne’e, Hospitál Nasionál Guido Valadares (HNGV) mós infrenta problema ba ai-moruk saúde mentál nian, maibé daudaun ne’e SAMES hahú prepara atu distribui tuir sira nia pedidu.
Medikamentu tipu lima Resperidona 36.000 tabletas, Triflueperazone 36.000 tabletas, Fluxetine 16.000 tabletas, Chlopromazine 50 ampolas no Carbonazipine 1503 tabeltas.
“Ami halo inspesaun hotu ami mos halo distribuisaun kedas ba iha Hospitál Referál Covalima atu halo atendimentu ba pasiente moras mental sira ne’ebé mak presiza tebes,” nia afirma.
Iha fatin hanesan, Diretór Aprovizionamentu SAMES, Nelson Correia, informa orsamentu ne’ebé mak aprova atu sosa medikamentu saúde mentál mai husi Komisaun F Parlamentu Nasionál ho orsamentu millaun $25.
“Hosi osan millaun $25 ne’e ita ezekuta de’it millaun $180 hodi sosa medikamentu ne’e ho tipu 13. Maibé tipu lima mak tama ona no sira seluk sei tama fazeadamente, iha fulan ida ne’e, no fulan oin,” nia afirma.
Kompaña ne’ebé durante halo akizasaun ba produtu saúde mentál mai husi kompaña haat, hanesan kompañia nasionál rua mak 3D LIFE no Betesdha. Enkunatu kompañia internasionál rua mak hosi Portugál no Olanda.
Jornalista : Felicidade Ximenes
Editór : Florencio Miranda Ximenes
