DILI, 06 maiu 2024 (TATOLI)-Parlamentu Nasionál (PN), submete ona alterasaun daruak hosi lei númeru 8/2009, loron 15 Jullu, Komisaun Antí-Korrupsaun (CAC, siglá portugés) ba Prezidente Repúblika (PR) atubele promulga.
“Haruka ona iha semana kotuk,’’ Prezidente Parlamentu Nasionál (PPN), Maria Fernanda Lay, responde Ajénsia TATOLI iha resintu Parlamentu, segunda ne’e.
Antes ne’e iha 22 abríl, PN liuhusi reuniaun plenária aprova proposta alterasaun lei CAC iha finál globál ho votu afavór 37, kontra no abstensaun 0.
Notísia relevante: PN sei fó prioridade diskute alterasaun lei CAC
Antes tama ba votasaun finál globál, deputadu sira halo uluk diskusaun no votasaun ba alterasaun lei CAC iha faze jeneralidade ne’ebé aprova ho rezultadu votu hanesan, hodi kontinua kedas ba espesialidade ne’e aprova kada artigu.
Tuir textu orijinál ne’ebé Governu aprezenta ba alterasaun hosi lei númeru 8/2009, loron 15 Jullu, hanesan iha artigu 7 númeru 1, katak komisáriu designa husi Parlamentu Nasionál, liuhusi proposta Governu, ho maiória absoluta husi Deputadu, no toma pose perante husi Prezidente Parlamentu Nasionál.
Artigu 11 iha alínea g), exonerasaun, aprova husi maiória absoluta husi deputadu, liuhusi fundamentu husi Primeiru Ministru, iha kazu violasaun obrigasaun husi komisáriu dekorente iha lei.
No iha númeru 9, iha kazu sesaun mandatu ho termu mezmu, komisáriu mantein ninia funsaun to’o pose titulár foun.
Iha diskusaun espesialidade ne’e deputadu sira aprezenta proposta alterasaun ida ba artigu 11 husi textu orijinál ba proposta alterasaun ne’e, hodi armoniza liafuan balun.
Nune’e ho aprovasaun ne’e, PPN husu Komisaun A trata asuntu Justisa no Konstituisional atu halo nia redasaun finál, hafoin envia ba Prezidente Repúblika mak iha kompeténsia eskluziva atu promulga.
Entertantu, iha diskusaun no votasaun alterasaun lei CAC ne’e, Deputadu husi bankada opozisaun FRETILIN ho PLP la partisipa.
Antes ne’e, Komisáriu CAC sesante, Sérgio Hornai da Costa, ninia mandatu ramata iha loron 21 janeiru 2023, ne’ebé to’o agora seidauk iha naran foun okupa kargu ne’e tanba laiha konsensu entre Deputadu bankada Governu no opozisaun.
Liuhusi reuniaun líder bankada PN, konsege halo ona ajenda dala-neen hodi diskute kona-ba naran Komisáriu ne’ebé Governu propoin ona, maibé tanba razaun téknika ka kórum la to’o maka la konsege realiza to’o agora.
Iha loron 19 fevereiru, Governu haruka ona naran Rui Pereira dos Santos, nu’udar kandidatu úniku ba Komisáriu CAC.
Notísia relevante: PN aprova alterasaun lei CAC iha finál globál ho votu afavór 37
Jornalista: Nelson de Sousa
Editor: Florencio Miranda Ximenes
