SEFOPE no TISC asina memorandu hodi fó oportunidade ba timoroan serbisu iha Japaun
DILI, 07 Maiu 2024 (TATOLI) – Sekretaria Estadu Formasaun Profisionál no Empregu (SEFOPE) asina memorandu entendimentu ho empreza Tsukuba Industrial Support Cooperation (TISC) hodi loke oportunidade ba foinsa’e timoroan sira ne’ebé iha abilidade atu bá serbisu iha Japaun.
Diretór Nasionál Empregu Esteriór (DNEE), João Pereira, informa katak kooperasaun ho empreza nipónika ne’e formaliza ona iha 03 Maiu 2024, iha Japaun, bainhira Sekretáriu Estadu, Rogério Mendonça, halo vizita traballu bá nasaun ne’e.
Dirijente ne’e esplika objetivu husi nota entendimentu ne’e atu fó biban ba timoroan sira serbisu iha Japaun iha área ne’ebé de’it, maibé tenke hetan uluk formasaun iha língua japoneza hodi bele fasilita sira halo komunikasaun ho empreza ne’ebé sira serbisu ba.
“Agora, ita presiza halo preparasaun di’ak hodi fó formasaun lian japonés ba joven sira, nune’e bainhira empreza presiza timoroan sira bá serbisu, ita hein halo de’it selesaun bazeia ba rekizitu ne’ebé empreza presiza”, João Pereira dehan iha Caicoli, ohin.
Daudaun ne’e, SEFOPE haruka ona timoroan hamutuk na’in-20 bá serbisu iha Japaun, maibé sira laiha abilidade iha língua. Tanba ne’e, presiza iha preparasaun ida di’ak ba joven sira atu la bele difikulta sira bainhira bá serbisu.
“Agora, formasaun alvu mak lian Japaun, ne’ebé iha Dili laran agora ne’e iha ona fatin formasaun lian Japaun haat no bele haluan to’o munisípiu, nune’e bele kapasita joven sira iha nasaun ne’e. Espera timoroan ne’ebé sei tuir formasaun bele iha abilidade”, nia akresenta.
Iha vizita ne’e, aleinde selebra MoU ho Tsukuba Industrial, Sekretáriu Estadu mós hasoru malu ho empreza lubuk ida iha Japaun hodi ko’alia kona-ba kooperasaun no fó oportunidade ba empregadór sira hodi halo rekrutamentu ba timoroan sira ba servisu iha nasaun referida.
Sekretáriu Estadu mós halo koordenasun ho empregadór sira ne’ebé rekruta ona traballadór timoroan hodi hasa’e kuotasaun ka aumentu númeru traballadór timoroan.
Notísia relevante: Traballadór na’in-hitu sei arranka tan bá serbisu iha Japaun fulan ne’e
Jornalista: Tomé Amado
Editora: Maria Auxiliadora
