DILI, 08 maiu 2024 (TATOLI) –Primeiru-Ministru (PM), Kay Rala Xanana Gusmão, akompaña hosi Vise-Primeiru Ministru, Ministru Koordenadór Assuntu Ekonómiku, no Ministru Turizmu no Ambiente, Francisco Kalbuadi Lay, tu’un direta hodi observa foos iha Armazein-tolu.
Armazein foos ne’ebé Primeiru-Ministru ho ekipa Governante sira vizita maka Sentru Lojístiku Nasionál (CLN, sigla portugés) iha Tibar, munisípiu Liquiça, armazen kompañia importadór Lisun no armazein Perissos iha Hudi-laran.
Notisia relevante: Folin foos sa’e to’o $20, autoridade lokál Viqueque husu governu halo intervesaun merkadu
Objetivu husi vizita armazen foos ne’e, tanba Xefe Governu hakarak hatene estoke foos iha armazein sira liuliu foos iha armazein Tibar hodi bele halo intervensaun bá merkadu.
Hafoin vizita direta armazein foos hirak ne’e, Xefe Governu orienta Ministériu Komérsiu no Indústria (MCI), atu kontrola sirkulasaun foos importadu iha rai-laran no kontrola folin foos tanba foos ho marka Folsom fa’an iha munisípiu ho folin la hanesan, alende ne’e tenke kontrola mós kualidade foos.
“MCI tenke kontrola didi’ak foos sira ne’ebé fa’an iha munisípiu tanba ita haree foos Folsom iha armazein barak loos maibé iha foho ne’ebá foos laiha no folin bo’ot tebes. Tenke kontrola mós kualidade foos sira ne’e tanba iha foos balun kualidade la di’ak,” PM Xanana hateten hafoin observa armazein Perissos, iha Fatuhada, kuarta ne’e.
Iha fatin hanesan, Diretór Ezekutivu empreza Perissos, James Fu Kong Jong hateten, estoke foos iha armazen sufisiente tebes.
“Ami-nia estoke foos iha armazen barak loos. Agora hela tonelada 10.000, ami fa’an ho folin normál,” nia dehan.
Foos sira ne’ebé daudaun iha armazein Perissos ho marka oioin hanesan foos Manu Vitoria, Globus, Amor de Familia no seluk-tán.
Iha armezein Lisun nian daudaun ne’e foos ho marka AAA kuaze tonelada 50 no masin-midar tonelada 10.000 ka saka 23.000.
Enkuantu, Iha armazein Tibar, estoke foos importadu hosi Cambodia hamutuk tonelada 4.000 ne’ebé Governu sosa hosi Cambodia bazeia bá akordu ne’ebé Timor-Leste ho Cambodia asina iha loron 20 outubru 2022, hodi halo akizasaun foos no iha tempu hanesan inisiativa ne’e nu’udár kompromisu Governu ne’ebé hatuur iha dekretu-lei númeru 76/2023 kona-bá intervensaun temporária ba estabilizasaun folin foos iha merkadu ne’ebé rai iha armazein CLN.
Husi akordu ne’ebé selebra entre país rua ne’e Cambodia importa foos tonelada 4.000, ne’ebé daudaun rai iha armazen Tibar.
Notisia relevante:Governu buka medida kontrola intermediária manipula folin foos
Jornalista: Hortencio Sanchez
Editór: Florencio Miranda Ximenes
