DILI, 08 maiu 2024 (TATOLI)-Parlamentu Nasionál (PN) hala’o hela diskusaun téknika ho Governu liuhusi Ministériu Finansa (MF) atu bele elabora ezbosu hodi aprezenta ba alterasaun Lei Enkuadramentu Orsamentál (LEO).
Notísia relevante:https://tatoli.tl/2024/03/14/komisaun-c-husu-governu-altera-lei-enkuadramentu-orsamental/
“Serbisu tékniku Parlamentu ho Governu prepara hela. Ne’ebé, serbisu hamutuk hela ho tékniku Ministériu Finansa atu elabora lei ne’e hodi sai esbozu hodi hato’o ba Governu para inisiativa sira-nia hodi hato’o mai Parlamentu hodi bele fó segimentu ba diskusaun,’’Prezidente Parlamentu Nasionál (PPN), Maria Fernanda Lay, informa ba jornalista sira hafoin ramata enkontru ho reprezentante Banku Mundiál iha sala konferénsia Parlamentu, kuarta ne’e.
Iha artigu 10-resin mak iha lei vijente hanoin atu altera.
“Iha artigu balun ne’ebé Tribunál deklara inkonstituisionál liga ho saldu ne’ebé tranzita automatikamente ne’e labele, ne’ebé iha artigu 10-resin, mas lembra mak saldu ne’ebé tranzita sein liuhusi Parlamentu. Ida-ne’e inkonstituisionál, tanba tenke sai reseita iha tinan oin, ida ne’e tenke iha kontrolu,’’nia dehan.
Nune’e, PPN dehan enkontru ho reprezentante Banku Mundiál sira mak husu no hanesan ita hatene sira fó asisténsia oioin ba ita-nia Governu no mós iha serbisu balun hamutuk ho Diresaun Nasionál Estatístika hodi haree kona-ba dadus.
Tan ne’e durante sorumutu asuntu importante balun sira hakarak hatene no hanoin ita-nian husi PN liga ho prioridade Governu saida mak ba ita-nia rai.
“Ne’ebé ha’u hato’o mandatu ida-ne’e, ami iha interrese tebes atu haree ba Lei Enkuadramentu Orsamentál (LEO) hodi haree altera fila-fali saida mak altera tiha sistema finanseiru hanesan ita-nia Primeiru-ministru hatete,’’ nia dehan.
Ida seluk mak liga ba polítika fiskál ita-nia, tanba ita hatene fundu mina-rai besik hotu ona, oinsá mak ita haree posibilidade atu esplora iha área fiskál ninian.
No ikus mak liga ba lei balun ne’ebé ita tenke halo hanesan lei rai ninian hodi bele sai garantia, hanesan ita hatene Timor-Leste iha osan likidés cash barak iha Timor maibé ita labele uza ne’e tanba garantia laiha, ne’ebé lei rai importante ita atu haree ho rejistu kolaterál hodi fó garantia ba setór privadu hodi halo enpréstimu iha banku sira.
“Nune’e sira mai husu ita hakarak saida no saida mak sira apoiu ita,’’ PPN dehan.
Notísia relevante:https://tatoli.tl/2023/08/24/pn-altera-artigu-hamutuk-18-iha-lei-enkuadramentu-orsamental/
Jornalista: Nelson de Sousa
Editór: Rafael Ximenes de A. Belo
