Ai-moruk NRT hotu, Servisu Saúde Ermera no Liquiça fó de’it akonsellamentu
DILI, 10 maiu 2024 (TATOLI) – Servisu Saúde Ermera (SSE) no Servisu Saúde Liquiça laiha ai-moruk Nicotine Replacement Therapy (NRT), tanba ne’e servisu saúde iha munisípiu rua ne’e fó de’it akonsellamentu ba fumadór sira.
Responsável ba Servisu Hapara Fuma (SHF), Odete Anita da Costa, informa, agora dadaun ne’e Servisu Hapara Fuma la’o hela, maibé, profisionál fó de’it akonsellamentu.
“Stock out ai-moruk Nicotine Replacement Therapy hotu tiha ona. Ami halo ona pedidu, maibé hein hela to’o agora. Ai-moruk ne’e hotu iha tinan rua liuba. Depoizde inaugurasaun uma ne’e, ba atendimentu ne’e ema mai barak no aimoruk ne’e hotu tiha”, Responsável SHF, Odete Anita da Costa, ba TATOLI, liuhusi telefone.
Responsável ne’e relata, fumadór sira ba halo tratamentu ba hapara fuma ne’e iha kada fulan ema hamutuk 30-resin.
Nia dehan, ema hirak ne’ebé ba halo tratamentu hodi hapara fuma ne’e ho idade prevalénsia 22 to’o 53 iha munisipiu Liquiça maioria mane.
Tuir nia, ema sira ne’ebé ba halo tratamentu hakarak simu NRT, maibé ai-moruk ne’e hotu agora, tanba ne’e númeru ema fumadór sira mai entre 30 no 35 kada fulan.
Iha sorin seluk, Diretór SSE, António de Deus Fátima, informa katak Servisu Hapara Fuma iha Sentru Saúde Ermera la’o hela, maibé ai-moruk nikotin mak laiha.
“Sira (fumadór) mai, ami fó de’it akonsellamentu, tanba ai-moruk hotu iha tinan kotuk”, nia hato’o ba Tatoli, liuhusi telefone.
Ezekutivu ne’e, dehan ekipa SHF fó promosaun edukasionál ba ema fumadór sira, maske ai-moruk NRT hotu iha Sentru Saúde Ermera.
Taxa ba moras internamentu iha ospitál hamutuk rihun-30 tinan-tinan no mate 20% ho idade produtivu kada tinan tuir dadus Organizasaun Mundiál Saúde iha 2019.
Tuir dadus Global Youth Tobacco Survey, iha 2019, fumadór entre foinsa’e sira idade 13-15 mós fuma sigaru ho númeru aas ho prevalénsia jeralmente 39%. Husi dadus ne’e 42% mane fuma no 21% feto. Nune’e mós ema na’in sia husi 10 iha 67% kontinua horon sigaru su’ar iha uma.
Notísia relevante:Fumadór 900-resin hapara fuma ho aimoruk NRT
Jornalista: Jesuína Xavier
Editór: Rafael Ximenes de A. Belo
