DILI, 10 maiu 2024 (TATOLI) – Padre kapelaun Ospitál Nasionál Guido Valadares (HNGV), Pe. Francisco Barreto, konsidera katak profisionál saúde sira hanesan enfermeiru no parteira sira nu’udar éroi ba ema nia vida liuhusi dedikasaun no prestasaun serbisu ba pasiente sira lorloron.
“Laiha dúvida katak enfermeiru no parteira no profisionál saúde sira sai verdadeiru éroi, tanba sira presta servisu ida-ne’ebé ba ema nia vida no servisu importante ba ema hotu nia saúde. sira iha liña oin hodi fó tulun ba maluk sira ne’ebé presiza,” Pe. Francisco Barreto, hateten, liuhusi omília, iha misa agradesimentu husi parteira no enfermeiru sira hodi komemora loron internasionál ne’ebé selebra iha 12 Maiu kada tinan, ho tema “Fó kuidadu ho domin ba pasiente nu’udar sentru kuidadu”, iha HNGV, ohin.
“Sira sai éroi, tamba maske hasoru dezafiu oioin. Sira tau nafatin prioridade domin ba moras sira, sira lahusik ema moras, sempre akompaña no hamriik iha sira-nia terus hodi tau-matan ba pasiente sira kalan loron,” Pe. Francisco Barreto rekoñese.
Amu kapelaun HNGV ne’e dehan, enfermeiru no parteira sira hala’o servisu kalan no loron hodi tau-matan no kuidadu ema moras sira. Tanba ne’e mak hato’o gratidaun no onra ba sira ne’ebé servisu maka’as no fó atensaun maka’as ba pasiente sira iha ámbitu tempu sira difisil no kmaan.
Profisionál saúde sira iha tempu no iha situasaun hothotu atu tau-matan no atensaun ba moras sira. Servisu sira ne’e bazeia ba siénsia no koñesimentu hodi hatudu halo di’ak ba pasiente sira liuliu sira ne’ebé presiza.
Tuir saserdote ne’e, sai enfermeira no parteira katak servisu ba moris no di’ak ba kura umanu pasiente sira-nia vida.
“Ida-ne’e sai onra no previlejiu bo’ot ida, tanba servi Maromak indiretamente ba Jesus Kristu. Jesus dehan: imi halo di’ak, buat di’ak ba ema ki’ik imi halo ba ha’u. Kristu nia prezensa iha maluk sira moras. Maromak nia prezensa iha maluk sira nia le’et,” nia haklaken.
Pe. Francisco Barreto, iha atividade eklesiástika hodi komemora loron mundiál ba enfermeiru no parteira sira ne’e, esplika, bainhira tau-matan, halo di’ak no hadomi moras sira ezatamente halo di’ak ba Maromak no hadomi Maromak.
“Servisu ida-ne’e previlejiu ba enfermeiru no parteira sira no ba profisionál saúde sira hotu ba kuidadu direitu pasiente sira nian. Sira mós iha papél espesiál atu halo prevensaun ba moras sira , tanba ne’e loron importante ida-ne’e ita kongratula sira ne’ebé iha ospital no klínika sira tan sira-nia domin hodi servi no tau-matan ba pasiente sira,” nia hateten.
Nai-lulik ne’e liatuun dehan, Jesus Kristu promete ksolok no alegria ba ema sira ne’ebé fiel ba nia knaar bo’ot no sai prémiu finál liuhusi dedikasaun servisu.
Iha biban ne’e, Prezidente Asosiasaun Enfemeiru Timor-Leste (AETL), José Dionizio, tenik, profisionál saúde sira komemora loron ne’e tanba hala’o sira-nia estudu liuhusi siénsia, koñesimentu no peskiza.
“Liuhusi estudu ne’e mak bele prodús ita sai profisionál no ho profisionál mak ita haklaken ba ema ne’ebé presiza ita-nia tulun. Maske profisaun simplis no baibain, maibé ema dehan sai forsa importante,” Prezidente AETL, José Dionizio, hateten, iha nia diskursu.
Tuir nia, profisaun ne’e mak fó tulun no atendimentu ba populasaun liuhusi promosaun, prevensaun no kurativu.
Prezidente ne’e rekoñese katak maske iha dezafiu no krítika barak maibé kontinua hatudu profisionalizmu no prontidaun hodi servi ema.
Servi ema hotu ho fuan no domin
José Dionizio reforsa, enfermeiru sira servi ema tuir prinsípiu enfermeiru no defende direitu moris ema nian ho dignu tuir siénsia. “Servi ema hotu ho fuan no domin iha ospitál ida ne’e hodi ema seluk bele apresia ita hotu nia servisu”.
Iha misa agradesementu parteira no enfermeiru sira renova sira-nia juramentu hodi bele hala’o knaar di’ak liután.
Depoizde misa agradesemente xefia HNGV mós fó sertifikadu rekoñesimentu ba profisionál saúde sira hanesan enfermeiru no parteira sira liu 20 ne’ebé hala’o ona knsar liu tinan-20 ba leten iha estabelesimentu ospitalár ne’e.
Jornalista: Jesuína Xavier
Editór: Rafael Ximenes de A. Belo
