iklan

BOBONARO, HEADLINE, MUNISÍPIU, SAÚDE

MS-PAM Bobonaro formaliza kompromisiu hapara TB iha 2025

MS-PAM Bobonaro formaliza kompromisiu hapara TB iha 2025

Ministra Saúde Elia dos Reis Amarál, ho Prezidente Autoridade Munisipál Bobonaro, Alexandrino Pires, formaliza akordu ba kompromisu deklarasaun hapara moras Tuberkuloza iha tinan 2025. Imajen Tatoli/Sérgio da Cruz.

BOBOBARO, 10 maiu 2024 (TATOLI) – Ministra Saúde Élia de Jesus Amarál, ho Prezidente Autoridade Munisipál (PAM) Bobonaro Alexandrino Pires, sesta ne’e ofisialmente asina akordu estabelesimentu ekipa Task-Force neʼebé deklara kompromisu atu hapara moras Tuberkuloza (TB) husi tinan 2024 to’o 2025 ho lema ‘Hamutuk hapara TB liuhusi esforsu multisetorál’.

Ministra Élia de Jesus Amarál mos formaliza akordu ho Reprezentante Organizasaun Mundiál Saúde, Arvin Matur, kona-bá apoia OMS nia atu kombate moras TB inkkui moras seluk iha Timor- Leste, atividade ne’e realiza iha ámbitu komemorasaun loron mundiál Tuberkuloza neʼebé kada tinan selebra iha loron 24 marsu ho lema ‘Sim ita mós bele hapara moras TB’.

Ministra Elia de Jesus, hateten mundialmente ema barak mak sofre no mate tanba moras Tuberkoloza no balu sai vulneravel tebes, tanba la produtivu atu halo serbisu no lakon rendimentu ba uma-kain ne’ebé afeta ba dezenvolvimentu ekonomia.

Iha Timor-Leste taxa insidénsia 486 ho taxa mortalidade 94 husi kada populasaun rihun 100, no taxa ida ne’e rejista aas liu iha rejiaun sudeste aziátiku no dahitu iha mundu.

Ema 6,200 sofre Tuberkoloza no 1,200 tanba TB kada tinan, ema na’in-rua kada loron mate tanba TB iha kada loron.

Notísia relevante: Janeiru-agostu MS deteta moras TB 2.800 iha TL

“Ho ida-ne’e ha’u iha komitmentu ba programa TB no programa peace servisu hamutuk ho xefe aldeia, atu nune’e ita-boot sira bele iha komitmentu atu kontrola komunidade sira-ne’ebé mai oin foun karik, iha ita-boot sira nia aldeia, identifika atu nune’e ita-boot sira bele asegura iha komunidade nia leet,” nia nateten iha Jináziu Maliana.

Ekipamentu no Teknolojia prátika ne’ebe mak introdús ona iha Timor-leste mak hanesan mákina ne’ebé hodi halo teste diagnóstika automátiku ida-ne’ebé bele identifika TB mikrobatéria, instala ona iha munisipiu 13 inklui Atauro.

Reprezentante Organizasaun Mundiál Saúde (OMS) iha Timor-Leste, Arvin Matur, sente kontente tanba munisípiu Bobonaro mós hakarak hola-parte iha deklarasaun kompromisu no hasa’e progresu iha luta hapara TB iha 2025.

Arvin Matur promete OMS kontinua iha komitementu atu apoia governu Timor-Leste atu prevene no hapara TB atu ema hotu bele moris ho saudável.

“Objetivu hapara TB iha bele atinje, maibé ita hotu presiza tau-liman hamutuk hodi kompromete ba neʼebé maka koordenadu, kolaborativu atu aselera progresu hapara TB iha Timor-Leste,” nia akresenta.

Prezidente Autoridade Munisípiu Bobonaro, Alexandrino Pires, hateten estabelesimentu ekipa Task-Force ne’e importante tebes, tanba moras TB fó impkatu boot ba dezenvolvimentu ekonómiku no dezenvolvimentu fíziku.

Tuir nia, tuberkoloza hanesan moras endémiku fasil atu hada’et no kada tinan sempre hamate ema barak iha mundu no Timor-Leste.

“Ha’u lori autoridade munisipál, profisionál saúde, líder komunitária, povu Bobonaro, igreja, veteranu sira deklara ba públiku munisípiu Bobonaro iha momentu ne’e hapara TB iha tinan 2025,” nia hateten.

Ekipa Task-Force Multisetorál lidera husi Prezidente Autoridade Munisípiu Bobonaro Alexandrino Pires, Vise-Prezidente I atuál Diretór Servisu Saúde Munisipál Bobonaro Gil Bernardo Vicente, Vice II atuál Komandante Polísia Munisípiu Bobonaro, Superintedente Xefe Agustino Gomes da Silva, Vise III atuál Prezidente Konsellu Veteranu Munisípiu Bobonaro ho nia membru sira hanesan administrador postu administrativu neen, Diretór ezekutivu Hospital Referál Maliana, José Marcál da Cruz, Diretór Servisu Solidariedade sosiál, Acacio Barreto, Klínika Madre Ceclia no seluk tán.

Enkuantu esforsu sira ne’ebé ekipa Task-Force sei halo mak hanesan buka no deteta kazu TB ne’ebé mak sidadaun diagnóstika, detata komunidade no asagura sira-nia tratamentu tuir matadalan, screaning ba membru uma-kain mak iha kazu TB kada fulan-neen to’o 12 no akompaña to’o tinan.

Notisia relevante: KOICA ramata ona Jestaun Projetu TB iha munisípiu lima

Jornalista: Sérgio da Cruz
Editór: Evaristo Soares Martins

iklan
iklan

Leave a Reply

iklan
error: Content is protected !!