DILI, 08 abríl 2024 (TATOLI)—Ajénsia kooperasaun internasionál Korea (KOICA, sigla inglés) ramata nia Komisaun Jestaun Projetu (PCM) iha Munisípiu Dili, Baucau, Bobonaro, Covalima no Ermera.
Diretór Nasionál KOICA nian ba Timor-Leste, Yonhwa Kang, informa, implementasaun projetu ne’e hahú husi 2020 to’o 2024 hamutuk ho parseiru Organizasaun Internasionál ba Migrasaun (OIM) no Ministériu Saúde iha Munisípiu Dili, Baucau, Bobonaro, Covalima no Ermera, ho objetivu atu deteta moras tuberkuloze (TB), hala’o diagnóstiku no tratamentu sedu ba ita-nia populasaun sira.
“KOICA hamutuk ho Ministériu Saúde ohin selebra ho susesu projetu TB nian ne’ebé mak durante tinan haat hala’o servisu ida-ne’e hodi detekta rezultadu husi esforsu koletivu ida-ne’e hamutuk hodi fó tratamentu sedu ba populasaun sira,” Yonhwa Kang informa ba TATOLI iha Novo Turizmu, ohin.
Liuhusi Sorumutu Enserramentu Projetu PMC, KOICA avalia projetu atu hapara Komisaun Jestaun Projetu TB iha munisípiu lima iha Timor – Leste.
“Rezultadu ida-ne’ebé partikularmente boot mak rezultadu husi estudu TB, ne’ebé sai hanesan komponente importante ida husi ita-nia programa insentivu kona-ba moris. Rezultadu hirak-ne’e iha poténsia atu hadi’a signifikativamente ita-nia komunidade nia saúde no moris-di’ak,” nia dehan.
Yonhwa Kang, esplika projetu ne’e fó ona informasaun ne’ebé folin-boot kona-ba dezafiu sira ne’ebé ema afetadu husi tuberkuloze.
Iha oportunidade ida-ne’e KOICA ofisialmente anunsia transferénsia ekipamentu hosi KOICA PMC ba Ministériu Saúde hanesan; karreta haat, mákina rua hanesan X-ray, laptop hitu, meza no kadeira.
“Hau fiar katak ekipamentu ne’e sei sai rekursu ne’ebé folin-boot hodi apoia servisu signifikativu husi Ekipa Programa Nasionál TB iha futuru. Rekursu hirak-ne’e sei kontinua serbí ita-nia misaun hafoin projetu ne’e ramata. Aleinde ne’e, ha’u mós hato’o ha’u-nia apresiasaun ba ami-nia parseiru implementadór sira; OIM, Klibur Domin, no ema dedikadu hotu-hotu ne’ebé envolve ba sira-nia kompromisu ne’ebé boot. KOICA fiar katak ita-nia hakaas aan koletivu sei loke dalan ba futuru ne’ebé di’ak liu no reziliente liután,” nia hatutan.
Iha fatin hanesan, Xefe Programa Nasionál Tuberkuloze iha Ministériu Saúde, Constantino Lopes agradese ba projetu Manajemen KOICA ne’ebé implementa ona durante tinan haat dezde 2020 to’o 2024 hodi deteta kazu pozitivu TB iha Dili, Baucau, Bobonaro, Covalima no Ermera.
“Hodi Governu liuhusi Ministériu Saúde ha’u agradese ba projetu KOICA ne’ebé implementa ona durante tinan haat dezde 2020 to’o 2024 hodi deteta kazu pozitivu tb iha Dili, Baucau, Bobonaro, Covalima no Ermera. Husi projetu ne’e KOICA fó apoiu tokon $ neen ba Ministériu Saúde hodi kombate kazu TB iha Timor – Leste,” Constantino Lopes.
Entertantu, husi 2020-2024 Ministériu Saúde halo ona tratamentu ba kazu Tb liu ona 3.500 iha ospitál sira iha Timor-Leste.
Jornalista: Felicidade Ximenes
Editór: Rafael Ximenes de A. Belo
