OÉ-CUSSE, 10 maiu 2024 (TATOLI) – Autoridade Rejiaun Administrativa Espesiál Oé-Cusse Ambeno (RAEOA) lideradu Rogério Tiago Lobato, seidauk ezekuta kategoria kapitál menór no kapitál dezenvolvimentu hosi Orsamentu Jerál Estadu (OJE) 2024 nian tanba portál Ministériu Finansa hatudu katak kategoria orsamentál rua ne’e sei zero hela.
Dokumentu ofisiál ne’ebé Ajénsia TATOLI asesu hosi Gabinete Prezidente Autoridade RAEOA, ezekusaun konsolidadu ba RAEOA no Fundu Espesiál Dezenvolvimentu (FED) OJE 2024 nian hamutuk millaun $60, rezultadu ezekusaun to’o fulan maiu ne’e foin atinje 6.6%, komposta husi administrasaun RAEOA millaun $40 ho taxa ezekusaun 8,7% no FED millaun $20 ho ezekusaun atuál 0,6%.
Prezidente Autoridade RAEOA, Rogério Tiago Lobato, rekoñese ezekusaun foin atinje 6.6% tanba seidauk halo pagamentu ba projetu sira.
“Ezekusaun ne’e seidauk boot tanda hein de’it revedesaun ne’ebé AND (Ajénsia Dezenvolvimentu Nasionál) halo kona-bá estrada boot rua ne’e, Noefefan ba Oénunu no husi Tono ba Oésilo, tanba ne’e mak ezekusaun ne’e sei ki’ik,” Rogério Tiago Lobato, ko’alia iha Oé-Cusse, kuarta ne’e.
Ba oin, Autoridade RAEOA sei esforsa atu prodús rezolusaun ida, nune’e bele sai matadalan atu halo pagamentu ba projetu sira, tantu estrada, eskola, bee-moos no seluk tán.
“Bainhira iha ona rezolusaun ida, ba iha oin sei halo pagamentu tuir lei nune’e ezekusaun ne’e sei sa’e,” nia argumenta.
Notísia relevante: OJE 2024, RAEOA ezekuta 4% maioria selu saláriu no vensimentu
Ezekusaun RAEOA nian ba programa mak hanesan; aumenta sustentabilidade produtidade produsaun atinje 10%, jestaun sustentável ba rekursu naturál, utilizasaun no konservasaun atinje ona 6%, edukasaun no formasaun atinje ona 14%, saúde atinje ona 5% no funsionamentu dezenvolvimentu instituisioál atinje ona 17%.
Kona-bá ezekusaun ba FED foin mak atinje 0.69%, dadus hatudu katak ida-ne’e akontese de’it iha bens no serbisu, maibé ba transferénsia públika 0.00%, kapitál menór 0.00%, no kapitál minór 0.00% no kapitál desemvolvimentu 0.00%.
“Tanbe ne’e RAEOA presiza buka solusaun no estabelese nia mekanizmu ba exekusaun FED,” refere iha dokumentu ofisiál ne’e.
Iha dokumentu ne’e mós, sujere ba tékniku sira katak, RAEOA liuhusi Prezidente
Autoridade hamutuk membru Autoridade sira presiza sesaun traballu ida, hodi estabelese konsellu administrasaun no konsellu fiskalizasaun, nune’e ezekusaun ne’e bele iha progresu.
Ezekusaun kada divizaun
Tanba rezultadu ezekusaun kada divizaun ba programa to’o fulan-maiu ne’e entre 4% to’o 15%, ida-ne’e presiza solusaun membru autoridade ba ezekusaun OJE 2024 nian.
Tuir mai ezekusaun kada divizaun mak hanesan tuir mai ne’e; Gabinete Prezidente Autoridade atinje ona 4.99%, iha Sekretaria Rejionál ba Asuntu Finansa atinje 12.69%.
Iha Sekretaria Rejionál ba Asuntu Administrasaun atinje ona 5.85%, Sekretariu Rejionál ba Asuntu Agrikultura atinje ona 15.47%, Sekretariu Rejionál ba Asuntu Terra no Propriedade atinje ona 4.32%, Sekretariu Rejionál ba Asuntu Saúde atinje ona 12.40% ba Komérsiu no Indústria atinje ona 4.58% no Sekretariu Rejionál ba Asuntu Edukasaun no Solidariedade Sosiál atinje ona 15.17%.
Nune’e ezekusaun iha Gabinete Prezidente Autoridade RAEOA foku liu ba iha saláriu, bens (sasán) no servisu, maibé ba transferénsia públika, kapitál menór no kapitál dezenvolvimentu seidauk hatudu mudansa.
Notísia relevante: Orsamentu millaun $60 ba RAEOA la sufisiente atu finansia projetu kontinuasaun iha 2024
Entretantu, bazea portál transparánsia Ministériu Finansa nian, husi ezekusaun 6,6% ne’e fahe ba kategória lima mak hanesan;
Saláriu no vensimentu
Saláriu no vensimentu $14,949,790.00 maibé kompromisu sei $00 hanesan mós ho obrigasaun sei $00 no reál $3,345,988.52, saldu atuál hamutuk $11,603,801.48, nunue’e totál ezekusaun 22,4%.
Bens no servisu
Bens no serbisu hamutuk $21,032,308.00 ho nia kompromisu $654,390.45, nia obrigasaun $272,974.35, reál $103,991.98 ho saldu atuál $20,000,951.22 ho totál ezekusaun 1.8%.
Transferénsia públika
Transferénsia públika hamutuk $7,178,685.00 maibé kompomisu sei $00 no obrigasaun $69,450.00, reál $151,640.00 ho nia atuál $6,957,595.00 ho totál ezekusaun 3.1%.
Kapitál menór
Kapitál menór hamutuk $350,076.00, kompromisu $43,871.50 maibé obrigasaun sei $00 hanesan mós ho reál, nune’e totál saldu atuál $306,204.50 ho ezekusaun 0,0%.
Kapitál dezenvolvimentu
Kapitál dezenvolvimentu hamutuk $16,517,750.00 maibé iha kompromisu sei $00 hanesan mós ho obrigasaun no sei $00, nune’e totál saldu atuál $16,517,750.00 no ezekusaun sei 0,0%.
Nune’e, ezekusaun OJE hosi RAEOA nian jeralmente to’o loron-sesta, 10 maiu 2024, tuku 17:03 foin atinje 6.6% hosi montante orsamentu millaun $60.
Notísia relevante: DRI no ADN fiskaliza uluk projetu 183 molok halo pagamentu
Jornalista : Abílio Elo Nini
Editór : Evaristo Soares Martins
