BOBONARO, 11 maiu 2024 (TATOLI)–Prezidente Autoridade Munisípiu (PAM) Bobonaro, Alexandre Pires, akompaña husi Diretór Servisu munisipál sira, sábadu ne’e, tun direita ba terrenu hodi observa kondisaun estrada iha área Zulo-il, suku Lontas, postu administrativu Lolotoe, munisípiu Bobonaro, ne’ebé ho kondisaun estragu totál, hafoin akontese udan-boot iha fulan kotuk liubá.
Hafoin halo observasaun, PAM Bobonaro kompromete iha segunda semana oin sei hato’o pedidu urjénsia ba Ministériu Obra Públika (MOP) atu orienta Institutu Jestaun Ekipamentu Apoia Dezenvolvimentu Infrastrutura, Institutu Públiku (IGEADI,I.P) halo intervensaun imediata, tanba husi parte autoridade Bobonaro labele hola medida ruma hodi rezolve problema ne’e tanba laiha alokasaun orsamentu no ekipamentu pezadu.
“Se IGEADI,I.P ne’e iha ha’u-nia liman karik, agora kedas tun, maibé problema mak sira ne’e destakamentu territóriu, entaun tenke halo pedidu para orienta ona mákina boot sira atu normaliza ona hodi fasilita movimentu transporte públiku no privadu sira bele liu bá-mai, lae husi postu Lolotoe bá Bobonaro ho Maliana bá Dili susar tebes atu evakua moras sira susar, ambulánsia mai labele ultrapasa tanba labele liu,” Autoridade munisipál ne’e informa ba Jornalista sira iha terrenu.
Iha fatin hanesan, Diretór Servisu Munisipál Obra Públika unisípiu Bobonaro, Marcelino Gonçalves Godinho, konfirma pedidu ne’ebé submete ba IGEADI,IP nasionál iha loron 02 maiu to’o agora seidauk iha resposta.
“Ami cek beibeik maibé to’o agora seidauk iha despaisu, ne’ebé ita hein de’it bainhira loos, depende ba nasioná,” Diretór dehan ba PAM Bobonaro.
Notisia Relevante : Líder komunitária husu Governu rezolve kondisaun estrada Zuloil-Lolotoe
Iha sorin seluk, Xefe suku Lontas, Duarta da Costa, apresia no fiar katak ho prezensa PAM, iha tempu badak Governu bele konsidera hodi rezolve kondisaun estrada ne’e.
“Ha’u hakarak hadi’a lalais iha tempu badak, nune’e molok tama loron 20 de maiu, ita-nia komunidade bele asesu bá-mai tanba ami xefe suku tolu hanesan Lontas,Gildapil no Lebos susar tebes atu mobiliza komunidade ba komemora loron restaurasaun independénsia, sa tan tempu agora hotu-hotu hakarak uza de’it transporte,” nia relata.
Notísia Relevante : DSMOP submete ona pedidu ba IGEADI normaliza estrada Lolotoe
Tuir observasaun Jornalista Tatoli iha terrenu, nota katak transporte motorizada no karreta sei bele halo movimentu bá-mai maibé tenke la’o ho kuidadu tanba rai-halai halo estrada laran nakfera hotu.
Postu administrativu Loloto’e kompostu husi suku hitu, aldeia 20 ho totál populasaun 7.695 husi uma-kain 1.591.
Jornalista : Sérgio da Cruz
Editora : Julia Chatarina
