ANC-TL husu Governu sosa ai-moruk NRT
DILI, 13 maiu 2024 (TATOLI)–Diretór Ezekutivu Aliansa Nasionál Kontrolu Tabaku Timor-Leste (ANC-TL, sigla portugés), Sancho Belito Fernandes, husu Governu liuhusi Ministériu Saúde atu kontinua sosa ai-moruk Nicotine Replacement Therapy (NRT) halo tratamentu ba ema fumadór sira ba iha Servisu Hapara Fuma iha Sentru saúde sira.
Notísia Relevante: Ai-moruk NRT hotu, Servisu Saúde Ermera no Liquiça fó de’it akonsellamentu
Tuir ANC-TL nia monitorizasaun iha munisipiu Ermera, Liquiça no Dili, ai-moruk NRT hotu hahú iha tinan kotuk, no ai-moruk sira-ne’e besik ona fora prazu mak foin haruka ba sentru saúde sira.
“Tratamentu ne’e sira hala’o akonsellamentu de’it. Aimoruk NRT ne’e ka nikotin hotu desde tinan kotuk,” Aliansa Nasionál Kontrolu Tabaku Timor-Leste (ANC-TL, sigla portugés), Sancho Belito Fernandes, hateten ba Agência Tatoli liuhusi telefónika, segunda ne´e.
Nia dehan, ida-ne´e asuntu responsabilidade Governu tau planu iha Orsamentu Jerál Estadu kada tinan inklui saláriu ba profisionál saúde sira.
Nia konsidera Servisu Hapara Fuma iha Sentru Saúde Formosa iha Dili fó rezultadu pozitivu, tanba ema barak bele hetan tratamentu hodi hapara fuma.
Servisu kombate hapara fuma ne’e mós importante, tanba moras lahadaet hanesan kardiovaskular no tensaun oho ema barak.
Atualmente, nia dehan, Servisu Hapara Fuma iha Munisipiu Ermera no Liquiça laiha ai-moruk NRT ba atendimentu ema fumadór sira.
Servisu Hapara Fuma iha Sentru Saúde Formosa Dili agora para totalmente para hahú husi marsu, tanba laiha ai-moruk NRT no profisionál saúde ba atende ema tabazismu.
Taxa ba moras internamentu iha ospital hamutuk rihun 30 kada tinan no mate 20% ho idade produtivu kada tinan tuir dadus Organizasaun Mundial Saúde iha 2019.
Tuir dadus Global Youth Tobacco Survey iha 2019, fumador entre foinsa’e sira idade 13-15 mós fuma sigaru ho númeru aas ho prevalensia jeramente 39%.
Husi daudus ne’e, 42% mane ne’ebé fuma no 21% feto sira mós fuma, nune’e mós ema na’in-sia (9) husi 10 iha 67% kontinua horon sigaru su´ar iha uma.
Jornalista : Jesuína Xavier
Editór : Cancio Ximenes
