DILI, 15 Maiu 2024 (TATOLI)–Diretór Ezekutivu Klinika Bairo Pité, Kewen Robert Lu Pereira, hateten husi janeiru to’o maiu ne´e klinika Bairru Pité rejista kazu tuberkuloze (TB) hamutuk 177 no pasiente sira-ne’e halo hela tratamentu iha klinika ne’e.
Notísia Relevante: Janeiru-dezembru, KBP rejistu kazu Tb 494 no na’in 11 lakon vida
“Pasiente sira-ne’e halo teste ba kaben-tasak. Pasiente sira konfirmadu teste pozitivu,” Diretór Ezekutivu Klinika Bairru Pité ne´e hateten ba jornalista sira, iha Klinika Bairru Pite, kuarta ne´e.
Diretór ne’e hateten, ema-ne´ebé moras TB tenke halo tratamentu entre fulan tolu to’o neen hodi hemu ai-moruk rutinamente.
Responsável ne’e garante, klinika Bairru Pité iha edifisiu ida iha Tibar hodi bele izola pasiente sira sofre TB ho objetivu atu evita transmisaun moras ne’e ba ema seluk.
“Sira-ne’ebé teste kaben tasak pozitivu, Ita haruka ba deskansa iha ne’ebá atu hamenus transmisaun moras, tanba ida-ne’e iha risku ba ema seluk nia saúde,” nia dehan.
Hafoin hemu ai-moruk durante fulan-tolu (2) no profisionál saúde sira ba halo teste, no iha rezultadu pozitivu mak haruka pasiente sira bele fila ba uma.
Nia esplika, moras TB mai husi infesaun vírus iha pulmaun ne’ebé nia transmisaun hosi ema ba ema seluk no bele kauza husi ambiente no hela fatin.
Nia sujere ba ema hotu no pasiente sira pozitivu TB atu bele iha distánsia no mear taka ibun atu evita transmisaun moras ema ba ema.
Jornalista : Jesuina Xavier
Editór : Câncio Ximenes
