DILI, 15 maiu 2024 (TATOLI)—Governu liuhusi Ministériu Administrasaun Estatál (MAE) sei distribui motorizada 904 inklui uniforme ba suku hamutuk 452.
“Motorizada atu apoia ba suku hamutuk 904, kada suku sei hetan motór rua, ida xefe suku sira mak uza no ida seluk ba serbisu operasionál no administrasaun suku nian, agora nia prosesu iha Komisaun Nasionál Aprovizionamentu,” Diretór Jerál Dezentralizasaun Governu Lokál, António Agusto Guterres, informa ba Agência Tatoli, iha ninia knaar fatin, MAE, Caicoli, kuarta ne’e.
Aleinde ne’e, MAE mós prepara ona uniforme ba xefe suku sira, maibé hafoin xefe suku eleitu na’in-10 simu pose iha fulan-juñu mak hahú prosesu husi sukat uniforme.
Kona-ba prosesu rekrutamentu pesoál apoiu suku, daudaun finaliza ona no hein tama iha faze asina kontratu.
Notísia relevante : Deputada PD sujere insentivu ba xefe suku atribui kada fulan
“Atu hateten katak daudaun insentivu subsídiu ba xefe suku sira seidauk tama tanba hein rekrutamentu ba pesoál suku na’in-haat ne’e kompletu ona mak foin Ministériu Finansa halo prosesamentu tanba pesoál na’in-haat ne’e ho nia pozisaun hanesan ofisiál administrasaun, ofisiál finansa, sekretáriu administrasaun no ofisiál asuntu sosiál suku,” nia informa.
Insentivu ba xefe suku kada fulan $200-resin no sei iha insentivu seña prezensa hamutuk $40 bainhira xefe suku organiza enkontru ruma iha nível suku.
Jornalista : Arminda Fonseca
Editora : Julia Chatarina
