DILI, 26 fevereiru 2024 (TATOLI)—Deputada Partidu Demokrátiku (PD) iha Parlamentu Nasionál (PN), Rozenha Martins, sujere ba Governu liuhosi ministériu relevante katak insentivu ba xefe suku sira-ne’e atu atribui kada fulan ba kada xefe suku ida-idak.
Notísia Relevante: Konsellu suku iha territóriu nasionál sei simu insentivu kada fulan
“Ha’u mós hakarak ko’alia kona-ba preokupasaun ne’ebé simu hosi xefe suku sira hosi Ainaro no lamentasaun hanesan mós mai hosi xefe suku Bairru Pite, Dili, no xefe aldeia sira. Sira iha asuntu ne’ebé mak hakarak hato’o, primeiru, kona-ba sira nia insentivu no sira husu sira-nia insentivu ne’e bele fó kada fulan, labele fó iha fulan tolu tanba sira iha nesesidade uma laran presiza atu atende,” nia levanta liuhosi reuniaun plenária PN, segunda ne’e.
Deputada hosi bankada Governu ne’e hato’o preokupasaun daruak hosi líder komunitáriu sira-nia transporte ne’ebé até agora daudaun hetan difikulta tebe-tebes sira atu hala’o serbisu, liuliu ba kontrola sira -nia povu iha área remota ne’ebé hosi aldeia ida ba aldeia seluk ne’e, distánsia dook tebes.
Reprzentante povu ne’e sujere, atu membru konsellu duku sira hanesan xefe aldeia mós presiza uza uniforme hanesan ho xefe suku sira, nune’e bele uza uniforme ne’ebé kór ida.
Notísia Relevante: Komisaun C sei ko’alia ho Governu altera lei ba insentivu xefe suku
Jornalista : Nelson de Sousa
Editór : Cancio Ximenes
