DILI, 16 maiu 2024 (TATOLI)—Reuniaun líder bankada parlamentár ne’ebé lidera husi Prezidente Parlamentu Nasionál, Maria Fernanda Lay, kinta ne’e, diskute atu aprezenta projetu rezolusaun ne’ebé aprezenta husi bankada opozisaun hodi bele rekomenda ba Governu atu bele solusiona problema antigu profesór kontratadu.
Notísia relevante:https://tatoli.tl/2024/04/26/ppn-orienta-komisaun-g-akompana-problema-antigu-profesor-kontratadu/
“Ohin, iha ajenda dahuluk mak atu aprezentasaun projetu rezolusaun ida husi bankada opozisaun tolu FRETILIN, PLP no KHUNTO ba problema profesór kontratadu sira. Ne’e tuir planu atu ajenda ba iha semana tuir mai (reuniaun plenária) iha 27 ou 28 maiu,” Sekretária meza Parlamentu Nasionál (PN), Virgínia Ana Belo, hateten ba jornalista sira hafoin enkontru reuniaun líder bankada iha sala konferénsia Parlamentu Nasionál.
Kona-ba projetu rezolusaun ba profesór sira-nian, nia dehan, husi bankada CNRT husu atu asuntu ida-ne’e sai asuntu nasionál ne´ebé presiza tau iha prioridade bankada hotu-hotu bele sai proponent.
Tanba, tuir nia, iha komisaun espesializa Parlamentu Nasionál liuhusi komisaun G ne’ebé trata asuntu Edukasaun, Juventude, Kultura no Sidadania mós iha rekomendasaun lubun hanoin sei ajusta hodi bele halo aprezentasaun
“Projetu rezolusaun ne’e bankada sira sei diskute posibilidade saida mak sujere ba Governu bele iha atensaun ba asuntu ne’e liuliu profesór kontratadu sira,” nia dehan
Entretantu, iha 26 abríl 2024, Prezidente Parlamentu Nasionál (PPN), Maria Fernanda Lay, kontinua orienta komisaun G hodi akompaña problema manorin kontratadu hodi bele buka solusaun.
Nia hateten, ohin simu audénsia daruak nian ho reprezentante eis manorin kontratadu tanba sira mak husu, tanba plenária foin lalais PN halo debate ho Ministériu Edukasaun (ME), Komisaun Funsaun Públika (KFP) kona-ba prolema manorin sira-nia nia problema ne´e seidauk hetan konkluzaun.
“Ha’u fó tan serbisu ne’e ba komisaun G sei halo akompañamentu ba lei ne’ebé ohin sira temi, inklui jurista sira iha Parlamentu, ita haree took ita bele resolve. Klaru sira husu mós atu hodi ba Primeiru-Ministru, ha’u dehan tenke rona lai problema ne’e saida, la rezolve mak ita lori ba Primeiru Ministru. Enkuantu eziste própriu ministériu mak rezolve, ha’u la gosta ba kesar asuntu ida ita bele rezolve envez lori hotu ba PM, nia iha asuntu barak,” nia hateten ba jornalista sira hafoin ramata audénsia iha sala konferénsia Parlamentu.
Nia hatutan, komisaun nia akompañamentu ne’e atu rona no analiza fali lei sira-ne’ebé eziste, tanba eis manorin sira-ne’e hato’o lei fó dalan, maibé KFP ho ME hato’o fali lei la fó dalan. Ne’ebé, problema ne’e interpreta lei mak la loos ka oinsá, nune’e nia-parte la hatene, nune’e tenke verifika didi’ak oinsá mak rezolve ida-ne’e.
Antes ne’e, PPN simu audiénsia dahuluk ho antigu manorin kontratadu sira-ne’e hodi rona sira-nia preokupasaun, hafoin ne’e orienta komisaun G hodi halo akompañamentu, nune’e komisaun konvida kedas ME, KFP hodi halo audénsia públika no hato’o relatóriu paresér hodi ikus mai realiza debate iha plenária ho ME no KFP.
“Ohin, ha’u hato’o konkluzaun serbisu komisaun G iha ona, se ne’e seidauk kontente, ami husu tan referénsia seluk. Entretantu iha informasaun balun ha’u lahatene iha tinan 2021 ou 2022 iha verifikasaun dadus ba profesór voluntáriu ne’ebé serbisu tempu naruk rejista, voluntáriu la tama iha ita-nia sistema ita lahatene,” nia dehan.
Portavós eis manorin sira, Agostinho Pinto, hateten enkontru ho PPN hanesan audiénsia faze daruak nian hodi atualiza fila-fali liuliu rezultadu plenária ne’ebé mak hala’o tiha ona, maibé momentu ne’eba la hetan konkluzaun ida.
“Entaun, ohin ne’e, ami mai para solusaun saida mak Parlamentu bele ajuda hodi rezolve, ne’e mak ohin ami mai kontinua mantein nafatin ami-nia ezijénsia,” nia dehan.
Iha parte seluk, tuir informasaun ne’ebé aprezenta katak maluk manorin kontratadu iha tinan 2023 hamutuk 963 mak partisipa iha teste bolsa kandidatu no iha na’in 50 mak pasa, ne’e agradese no parabeniza sira-ne’ebé liu, maibé sira ne’ebé la pasa kontinua nafatin hato’o ezijénsia.
Jornalista : Nelson de Sousa
Editór : Cancio Ximenes
