DILI, 16 maiu 2024 (TATOLI)—Profesora balun ne’ebé pasa iha vaga bolsa kandidatu, preokupa ho Ministériu Edukasaun (ME) nia kolokasaun ne’ebé la tuir área ensinu maibé bazeia ba nesesidade eskola.
ME iha loron 14 maiu 2024, fó pose ba profesór kualifikadu hamutuk na’in-480 hodi koloka ba eskola 276 iha territóriu tomak.
“Ha’u-nia preokupasaun maka polítika Ministériu Edukasaun nian mak ladún favorável ba kolokasaun profesór hodi destaka iha área rurál, liu-liu bá munisípiu sira, ne’ebé la tuir ema nia ida-idak iha munisípiu maibé ba fali munisípiu seluk. Hanesan ha’u-nia, ha’u pasa iha ensinu báziku maibé naran sai fali iha primeiru no segundu siklu, entaun ha’u la satisfeitu ho ida-ne’e,” Profesora emposada, Ernestina Lopes Barbosa, informa ba Agência Tatoli, via telefónika, kinta ne’e.
Ernestina Lopes hetan mandatu iha munisípiu área remota ne’ebé laiha kolega no família.
“Karik Ministériu Edukasaun halo ona kazerna ruma hodi desloka profesór ba área remota kondisaun saida mak iha ona? Polítika ida-ne’e hatudu momoos katak inan ida atu abandona nia oan ho idade kiik tanba de’it osan. Aleinde ne’e, iha profesora barak ne’ebé sei nervozu hela tanba Ministériu Edukasaun hapara sira-nia kontratu no sira la pasa iha rekrutamentu, ida-ne’e presiza haree no tenke apoiu seguransa ba profesora foun sira,” nia lamenta.
Notísia relevante : ME koloka ona profesór 480 ba eskola 276 iha territóriu tomak
Tanba ne’e, manorin-na’in ne’e rekomenda ba ME atu koloka nia iha Dili ho razaun oan sira eskola iha Dili no oan ida ho idade tinan-tolu.
Antes ne’e, profesora ne’e hili área inglés no hala’o knaar iha munisípiu Dili, maibé naran sai tenke destaka bá Ermera, “husu atu haree kestaun ne’e”.
Sekretáriu Estadu Ensinu Sekundáriu Jerál no Ensinu Tékniku Vokasionál no Ministru Edukasaun interinu, Domingos Lopes Lemos, esplika, kolokasaun profesór ba fatin seluk ne’e tanba antes ne’e sira deklara prontu atu hala’o serbisu iha ne’ebé de’it tanba nu’udar funsionáriu públiku.
“Ha’u hanoin atu simu ka la simu kolokasaun ne’e la’ós problema, kuandu sai ona funsionáriu públiku iha rai ida-ne’e,tenke prontu atu koloka bá iha ne’ebé de’it, agora nia filafali bá munisípiu seluk ne’e la’ós kestaun profesór nia, orsida Ministériu Edukasaun mós prepara subsídiu ruma atubele fó ba sira bele buka fatin iha ne’ebá hodi hela. Ne’ebé la’ós kestaun ida o simu ka la simu, hakarak ka lakohi, mais dever nu’udar funsionáriu públiku, ezatamente tenke simu,” nia reforsa.
Biban ne’e, nia konfirma informasaun ne’ebé dehan bainhira profesór ida destaka tiha iha munisípiu seluk, liu fulan-rua ka tolu sei muda fali ba ida-idak nia munisípiu, ne’e laloos.
“Bainhira destaka ona bá tenke serbisu iha ne’ebá ona, tanba nesesidade obriga no nesesita duni mak ami haruka bá ne’e. Se ita-boot ba fulan-ida ka rua muda fali tan, ne’e di’ak liu ita lalika halo rekrutamentu,” nia klarifika.
Jornalista : Osória Marques
Editora : Julia Chatarina
