DILI, 16 Maiu 2024 (TATOLI)–Governu liuhosi Konsellu Ministru aprova orsamentu millaun $12 ba preparasaun vizita Papa Francisco no husi orsamentu ne’e igreja utiliza rihun $61 hodi prepara ka monta elevadór iha rezidénsia nunsiatura Motael, hodi fasilita Papa durante loron tolu hala’o vizita pastorál iha Timor-Leste.
Notísia Relevane: Governu autoriza despeza to’o millaun $12 ba preparasaun vizita Papa Francisco
“Nunsiatura gasta osan $61.000 ba elevador ka lift hodi fasilita Papa Francisco, tanba amu Papa labele sa’e tuir eskada no atu to’o iha kuartu presiza elevadór. Entaun Governu oferese selu elevadór ba Papa, maske ami la husu buat ida,” Reprezentante Vatikanu iha Timor-Leste, Nunsiu Apostóliku, Monseñor Marco Sprizzi, hateten ba jornalista sira, iha Bidau, hafoin akopaña serimónia inaugurasaun sede sede Konferensia Episkopal Timorense (CET, sigla postugés) iha Bidau Mota-Klaran, kinta ne´e.
Nunsiatura ne´e hateten, nia parte aprezenta ona karta agradesimentu ida ba iha Governu, tanba bele oferese elevadór ba fatin ne’ebé amu Papa Francisco bele hela durante nia vizita iha Timor-Leste.
“Ami hakerek karta agradesementu ida ba Governu ne’ebé hakarak oferese elevadór, tanba ne’e mak iha orsamentu $12 millaun ne’e iha rihun $61 ba preparasaun elevadór. Ha’u agradese tebes ba ajuda Governu timorense atu bele fasilita Papa Francisco hodi monta elevadór,” nia hateten.
Preparasaun obra monta elevadór ne´e realiza ona ho lalais no efisiente, tanba realiza ona no daudau ne’e funsiona ka uza tiha ona.
Marco Sprizzi hateten informasaun iha jornál balun no mídia sosial relata Governu aloka tan rihun $61 ba nunsiatura ne´e falsa, tanba osan rihun $61 ne’e inklui ona iha millaun $12 ne´e.
Jornalista : Jesuína Xavier
Editór : Cancio Ximenes
