EKONOMIA, HEADLINE, MUNISÍPIU, OÉ-CUSSE (RAEOA)

Primeiru Ministru lansa voo dahuluk aviaun Aero Dili ba Oé-Cusse

Primeiru Ministru lansa voo dahuluk aviaun Aero Dili ba Oé-Cusse

Primeiru-Ministru, Kay Rala Xanana Gusmão, akompaña hosi pasazerus sira tu'un ho AERO DÍLI bainhira hahú nia Vou Primériu hosi Díli mai Oe-Cusse, Aeroportu Internasionál Oe-Cusse "Rota do Sândalo", sábadu (18/05). Imajen Tatoli/Francisco Sony

OÉ-CUSSE, 18 maiu 2024 (TATOLI) – Primeiru Ministru, Kay Rala Xanana Gusmão, sabadu ohin, lansa voo dahuluk aviaun aero Dili ba Oé-Cusse iha aeroportu Rota do Sãndalo, Rejiaun Administrativa Espesiál Oé-Cusse Ambeno (RAEOA). 

“Parabéns ba Autoridade RAEOA nia preparasaun atu ita selebra, tanba merese duni, hakuak boot ba Oé-Cusse oan tomak, ho ida-ne’e hanesan dudu uitoan ita-nia hanoin, ita-nia fuan ita-nia esperansa katak, ita agora atu la’o ba oin, lalika hanoin de’it ba kotuk, saida mak sala iha kotuk ami sei kurrije, agora Oé-Cusse oan sira prepara-an imi mak kaer, imi mak sei serbisu tanba Oé-Cusse só bele dezenvolve,” Primeiru Ministru ko’alia iha lansamentu voo dahuluk iha aeroportu Oé-Cusse.

Notísia relevante: Rogério Lobato preokupa despeza no reseita husi operasaun aviaun ZEESM

Prezidente Autoridade RAEOA, Rogério Tiago Lobato, agradese ba Prezidente Aero Dili, bele apoiu no hakarak fornese ona konetividade ida-ne’e, no agradese mós ba Ministériu Transporte Komunikasaun (MTK) no Autoridade Aviasaun Sivil (AACTL,I.P.)  Administrasaun Nacionál Aeroportu Timor-Leste (ANATL,E.P.), Diresaun Nasionál Meteorolojia no Diresaun sira-ne’ebé tutela iha MTK liu-liu ba IX Governu konstitusional lideradu Primeiru Ministru Kay Rala Xanana Gusmão ba apoiu tomak.

Prezidente Autoridade RAEOA, Rogério Tiago Lobato, asina akordu koperasaun ho Prezidente Administrasaun Navegasaun Aero Timor-Leste (ANATL) Romaldo António. Imajen Tatoli/Francisco Sony.

“Ohin, ita marka istória foun ida mai ita rai doben Oé-Cusse Ambeno, liuhusi mantein nafatin konetividade aérreu (voo regulár) mai Oé-Cusse ho aviaun Aero Dili, Airbus A320 ne’ebé boot,  bele akomoda pasajeiru purvolta 168, ne’e fó ona oportunidade, nune’e bele atrai vizitante barak liutan atu mai vizita ita rai oecusse,” nia orgullu.

Nia konsidera, liuhusi konetividade ne’e mós bele ajuda ekonomia, fó mós oportunidade ba negosiante sira bele hasa’e rendimentu no hamosu oportunidade kampu traballu ba Atoni-oan sira.

“Ohin loron ita realiza ona voo primeiru ida-ne’e, espera Aero Dili nafatin mantein fornese konetividade ida-ne’e no kontinua ba oin, nune’e bele apoiu dezenvolvimentu Oé-Cusse nian,  sai di’ak liután, husi konetividade ne’e, povu Oé-Cusse tomak husi ohin ba oin bele ona asesu ba transporte aérrdu ho presu ne’ebé baratu, lalais no seguru,” Nia orgullu.

Notísia relevante:Tékniku Aero Díli halo avaliasaun ba risku no infraestrutura iha aeroportu Rota do Sândalo

Diretór Aero Dili, Lorenço de Oliveira, hanesan emprezáriu iha aviasaun, garantia katak, sei la falta konetividade Dili Oé-Cusse no Oé-Cusse ba Dili ho folin billete $20 to’o $25 no kada voo sei tula pasajeiru na’in-168.

Diretór Aero Dili, Lourenço Oliveira. Imajen Tatoli/Francisco Sony.

“Ami sei hala’o dalarua segunda ho sesta, ba oin ita haree sei dalarua mak ema laiha pasiénsia ha’u sei hatún semana ida halai dala ida ho folin billete $20 to’o $25, sei ema sa’e nakonu ita rekompensa maibé se ema laiha ita sei la rekompensa, tan ne’e mak ita fó hatene ba ita-nia pasajeiru sira, sei kuidadu aviaun ne’e sai moos nafatin atu ema seluk mós bele sa’e ho kondisaun moos nafatin,” nia fó hanoin.

Komunidade sira kontente

Iha biban ne’e komunidade Liberato Punef husi suku Usitasa’e, sub-rejiaun Oésilo, senti kontenti tanba futuru bele fasilita Oé-Cusse asesu ba Dili ho lais.

“Foin daudaun manetek na’in-sira lori aviaun ida-ne’e mai to’o Oé-Cusse, ami iha-ne’e kontente, tanba avo Xanana mak kaer nasaun ne’e, entaun sei fasilita transporte di’ak liután, ne’e ami kontente tanba bele ba lalais lakleur fila mai,” nia orgullu.

Costancio Suni, agradese ba presu billete ki’ik, fó oportunidade ba ferik no katuas sira kabala tais bele mós asesu, kompara ho uluk presu billete karun $40, ema barak bele sa’e.

“Ha’u hanoin lansamentu ida-ne’e, pasu di’ak ida husi Autoridade RAEOA serbisu hamutuk ho MTK atubele fasilita Atoni-oan fasil atu ba beibeik, labele tabele de’it ba transporte terrestre no marítima, ha’u hanoin ba oin sei fasilita povu Oé-Cusse atu halo buat ruma iha kapitál, ne’e ita nasionál presiza urjente ita-bele ba ho aviaun, kompara ho uluk susar tebes atu asesu ba kapitál,  ha’u hanoin ba presu ba bainbain di’ak ona,” nia orgullu.

Luiza da Cunha, husi suku Cunha, sub-rejiaun Pante Makasar, senti orgullu no kontenti tebes tanba aviaun boot primeiru voo iha Oé-Cusse sei fasilita ba mai Dili ho lais liu.

“Tnba presu billete mós tuun kompara ho ida uluk karun tebes kada billete $50, maibé agora $20 husi Dili Oé-Cusse, no $22 husi Oé-Cusse ba Díli,” nia orgullu.

Notísia relevante: Aero Dili troka aviaun ZEESM semo bá Oé-cusse

Jornalista: Abílio Elo Nini

Editór: Evaristo Soares Martins

iklan
iklan

Leave a Reply

iklan
error: Content is protected !!