Uncategorized

Primeiru Ministru promete auditoria Aviaun ZEESM no Roo Haksolok

Primeiru Ministru promete auditoria Aviaun ZEESM no Roo Haksolok

Primeiru-Ministru, Kay Rala Xanana Gusmão. Imajen Tatoli/Francisco Sony

OÉ-CUSSE, 18 maiu 2024 (TATOLI) – Primeiru Ministru, Kay Rala Xanana Gusmão, promete ba povu sira iha Rejiaun Administrativa Espesiál Oé-Cusse (RAEOA), katak iha tempu badak sei halo auditoria ba Aviaun ZEESM no Roo Haksolok.

“Loos duni aviaun dehan primeiru maun, ema ida labele hateten seluk, katak aviaun ne’e primeiru maun, buka dokumentu laiha, maibé hatene husi dokumentu seluk, dehan segunda maun, ida-ne’e mak Prezidente Autoridade dehan tiha ona, atu halo auditória, no sei halo auditória ba buat hotu,” Xanana Gusmão, ko’alia biha aeroportu Rota do Sândalo Oé-Cusse, sabadu ohin.

Notísia relevante: Primeiru Ministru lansa voo dahuluk aviaun Aero Dili ba Oé-Cusse

Xefe Governu ne’e, afirma, Nasaun Timor-Leste, nu’udar nasaun direitu demókratiku, katak ema hotu hakruuk ba lei, tanba ne’e sei halo auditória internasionál ba polémika Roo Haksolok.

“Ha’u hatene, povu Atoni sei haksolok liu bainhira loke auditoria ba Roo Haksolok, lei iha ita hotu nia leten, la’ós ema balun iha fali lei nia leten, osan povu nian, ita sorte ona hetan osan husi fundu petrolíferu, tanba ha’u ba ona nasaun barak, kada tinan sira husu ba doadór sira hodi fó netik osan uitoan,” nia informa.

Nia husu ba povu Oé-Cusse kontinua serbisu hamutuk ho Autoridade RAEOA atu dezenvolve Oé-Cusse, tanba haleu direita hosi nasaun viziñu.

“Agora ami hein hela, atu halo auditoria ho instituisaun internasionál ida ba aviaun ne’ebé suspende hela ne’e, husi Governu Sentrál atan oan ha’u, sei haree ba auditoria mós internasionál ba roo ida-ne’e, kuandu to’o karik imi sei haksolok duni, haksolok tanba loke buat sira-ne’e ba ita hotu atu hatene,” nia katak.

Notísia relevante:RAEOA-ANATL selebra akordu ba operasionál aeroportu Rota do Sândalo

Prezidente Autoridade RAEOA, Rogério Tiago Lobato, informa operasaun Aviaun Twin Otter, hetan ona buat ne’ebé laloos durante ne’e, hahú husi prosesu akizisaun to’o operasaun iha 2024, buat laloos barak mak la’o ona.

Nia dehan, akizisaun no operasaun aviaun ne’e gasta ona osan Estadu besik millaun $30,  só hetan de’it reseita millaun $4.9,  ida-ne’e hatudu momoos, má-gastu no má-jestaun.

“Tan ne’e autoridade la permite atu kontinua la’o nafatin, mak autoridade propoin ona ba iha Konsellu Ministru hasai ona rezolusaun hodi termina tiha operasaun aviaun ida-ne’e, no dokumentu komprovativu orjinál ho naran bill of sale laiha, dokumentu ne’e sai hanesan dokumentu ne’ebé importante no hanesan prova ida,  ba ita hodi bele hatudu katak, ita mak na’in ba aviaun ne,” nia katak.

Tuir nia, prosesu sira-ne’e hotu atu rezolve kona-bá aviaun ne’e, agora dadaun la’o hela, no hetan apoiu másimu husi Ministériu Transporte no Komunikasaun (MTK) no Autoridade Aviasaun Sivil Timor-Leste (AACTL),  ho esperansa boot, sei iha rezultadu iha tempu badak nia laran.

Notísia relevante: Rogério Lobato preokupa despeza no reseita husi operasaun aviaun ZEESM

Jornalista: Abílio Elo Nini

Editór: Evaristo Soares Martins   

iklan
iklan

Leave a Reply

iklan
error: Content is protected !!