OÉ-CUSSE, 18 maiu 2024 (TATOLI) –Autoridade Rejiaun Administrativa Espesiál Oé-Cusse Ambeno (RAEOA), selebra akordu ho Aeroportu no Navegasaun Aérea Timor-Leste, Empreza Públika (ANATL.EP), kona-bá operasionál aeroportuáriu ba futuru sertifikasaun aeroportu Rota do Sândalo.
“Akordu ohin ne’e, atu haree kona-bá operasionál aeroportuáriu nian, ne’e foin mak asina hanesan MoU ida, depois ANATL sei prepara akordu no regra balun tan, nune’e prepara ba iha operasaun no sertifkasaun aeroportu nian,” Prezidente ANATL.EP, Romualdo António Soares da Silva, ba jornalista sira iha aeroportu Rota do Sândalo Oé-Cusse, sabadu ohin.
Notísia relevante: Primeiru Ministru lansa voo dahuluk aviaun Aero Dili ba Oé-Cusse
Nia esplika, akordu kooperasaun ne’e, espesífiku liu ANATL atu haree, prepara operasaun aeroportu ne’e rasik, kona-bá sertifikasaun aeroportu nian, Autoridade Aviasaun Sivíl Timor-Leste (AACTL) mak sei haruka karta mai iha ANATL, depois ANATL sei prepara buat hotu, nune’e bele submete ba iha AACTL atu verifika fasilidade sira iha aeroportu Rota do Sândalo.
“Bainhira buat hotu prienxe ona rekizitu foin mak AACTL aprova, atu nune’e ita loke ona voo internasionál ba nasaun hotu atu bele mai, maibé fasilidade iha aeroportu ne’e di’akliu aeroportu Comoro, maibé presiza ami hadi’a uitoan buat balun ne’ebé ladún di’ak, ami sei hadi’a iha tempu badak, atu asegura nune’e operasionál bele la’o ho di’ak,” nia katak.
Prezidente Autoridade RAEOA, Rogério Tiago Lobato, konsidera akordu ne’e importante ba futuru bele hetan legalidade husi Organização Aviasaun Sivíl Internasional (ICAO, sigla portugés).
“Asina protokolu kooperasaun ne’e, hodi koopera kona-bá sertifikasaun aeroportu inklui mós ba operasaun aeroportu Rota do Sândalo, nune’e aeroportu ida-ne’e sai aeroportu internasionál tuir rekizitu ICAO nian, no hetan legalidade simu voo internasionál mai Oé-Cusse, ho nune’e oportunidade barak mak sei mosu liuhusi kooperasaun ida-ne’e,” nia katak.
Tan ne’e nia agradese, tanba kooperasaun ne’e realiza hetan apoia máxima husi Ministériu Transporte Komunikasaun, AACTL,I.P. hamutuk ho Diresaun Nacional Meteorolojia no Geofisica (DNMG) inklui mós diresaun sira seluk iha IX Governu Konstitusionál.
Notísia relevante: MTK sei integra DRTT Oé-Cusse ba sistema nasionál atu asesu dokumentu orijinál
Ministru Transporte no Komunikasaun (MTK), Miguel Marques Gonçalves Manetelu, hateten, dezde kriasaun RAEOA no ZEESM, iha nasionál la rekoñese karta kondusaun no livrete ne’ebé prodús hosi transporte terrestre Oé-Cusse nian tanba konsidera provizóriu.
“Tan ne’e kordu ne’e hanesan inísiu ida, husi akordu seluk ne’ebé sei selebra entre MTK no RAEOA, espera katak akordu sira seluk, iha tempu badak ita-bele asina tanba iha loron 19 marsu foin lalais, ha’u nia vizita iha-ne’e ko’alia mós ho autoridade RAEOA, karta kondusaun ne’ebé uluk Oé-Cusse iha ketak ne’e, ita atu integra fali ba sistema nasionál, tanba bainhira Timor-Leste nia adesaun ba ASEAN ita iha karta kondusaun ida de’it, hanesan nasaun ida ita lalori karta kondusaun rua maibé ida de’it,” nia informa.
Notísia relevante: FOTO ATUÁL: Lansamentu primeiru vou Aero Dili ba Oe-cusse
Jornalista: Abílio Elo Nini
Editór: Evaristo Soares Martins
