SOSIEDADE SIVĺL

Me. Guilhermina: “Joven sira buka abilidade no uza katana sai lapis”

Me. Guilhermina: “Joven sira buka abilidade no uza katana sai lapis”

Korpu isar bandeira sira iha ámbitu komemorasaun loron Restaurasaun Independénsia Timor-Leste nian ba dala-21, iha Palásiu Prezidensiál, sábadu (20/05). Imajen Tatoli/Francisco Sony

DILI, 20 Maiu 2024 (TATOLI)–Madre Canossiana, Guilhermina Marçal, husu ba foinsa’e timóroan hotu atu hatene hadomi malu, labele odiu malu maibé buka abilidade hodi bele kontribui ba iha dezenvolvimentu Timor-Leste iha futuru.

Notísia Relevante: KM aprova tema komemorasaun loron 20 maiu ‘hametin instituisaun Estadu hodi serbí povu’

“Ha’u nia mensajen ba joven sira hotu iha rai laran no liur katak independensia ne’e luta makaas ne’ebé ita-nia eroi sira halo ba povu. Ne’eduni husu ba ita-nia joven sira atu bele hadomi ita-nia rai, hadomi ita-nia aan. Joven sira prepara-aan no esforsu ho másimu hodi buka abilidade, labele istori malu, labele tuda malu no odiu malu, para ho katana, no uza katana sai lapis no fatuk sai matematika. Iha 24 anus ne’e ita-nia eroi sira luta fakar raan no mate la goza hanesan ita agora”, Madre Guilhermina hateten ba Agência Tatoli nakait ho komemorasaun loron restaurasaun independénsia ba da-22, liuhosi telefónikao, segunda-ne’e.

Madre ne´e esplika, kolaborasaun joven sira-nian importante hodi prepara sira aan, tanba loron horisehik eroi sira halo no hakerek ona  istória no loron aban hahu ohin, tanba ne’e mak joven sira buka moris iha dame no domin hodi kapasita aan.

Independénsia la’ós mosu hanesan ne’e de’it, maibé ne’e kooperasaun entre povu ho Maromak ne’ebé mak Maromak fó grasa no milagre ba povu nia luta liuhosi intervensaun divina, tanba ne’e mak luta iha tinan 24 nia laran ne’e Timor-Leste bele hetan nia independénsia.

“Favór ida joven sira husik fatuk no oho malu ne’e. Hadomi ó-nia aan no ó-nia futuru katak hadomi ha’u-nia povu no ha’u-nia nasaun no hadomi Maromak,” nia hateten.

Timor-Leste restaura ona independénsia ba da-22  ne’e, tenke hamrik mesak no la’o mesak hodi halo bu’at hotu ho responsabilidade no domin, maske rekere iha sakrifísiu ba nia rain no nia povu.

“Parabéns ba ita hotu. Timor ida horisehik halo istória, Timor ida aban hahú ohin,” nia hateten.

Nia reforsa, Timor-Leste agora hahu preparasaun hodi bele adere ba iha Aosiasaun Nasaun Sudeste Asziátiku (ASEAN), tanba ne’e mak joven sira presiza prepara aan atu kompete.

Iha sorin seluk, Prezidente Fundasaun Mesjid Annur, Abdullah Said Sagran, apela mós foinsa’e sira atu investe nia aan iha edukasaun hodi bele dezenvolve nasaun ki’ik Timor-Leste iha futuru.

“Husu ba joven sira atu estuda barak, tenke investe nia aan iha edukasaun, atu bele kompete iha merkadu de traballu no labele sai penonton de’it iha futuru. Tenke bele no jere nasaun ba oin,”  Prezidente Fundasaun Mesjid Annur, Abdullah Said Sagran, ba Agência Tatoli, liuhosi telefónika.

Nia husu ba joven sira atu kria pás no estabilidade iha rai laran hodi bele kontribui ba iha dezenvolvimenti nasionál.

Tuir Abdulla Sagran, maske Timor-Leste nasaun ne’ebé ki’ik, bele kualifika aan iha rekursu sira hodi bele kompete ho nasaun sira seluk iha mundu.

Jornalista : Jesuína Xavier

Editór       : Cancio Ximenes

iklan
iklan

Leave a Reply

iklan
error: Content is protected !!