SAÚDE

Klinika Bairu Pité rejista pasiente HIV/SIDA halo tratamentu ativu hamutuk 253

Klinika Bairu Pité rejista pasiente HIV/SIDA halo tratamentu ativu hamutuk 253

Ilustrasaun HIV/SIDA. Imajen/Espesiál

DILI, 21 maiu 2024 (TATOLI)–Diretór Ezekutivu Klínika Bairru Pité, Kewen Robert Lu Pereira, hateten atualmente Klinika Bairru Pité rejista pasiente HIV/SIDA halo tratamentu ativu ne´e hamutuk 253.

Notísia Relevante: Klínika Bairru Pité kontinua rejista pasiente tuberkoluze no HIV/SIDA

“Husi totál númeru pasiente ne’e kompostu husi pasiente mane hamutuk 181 no feto hamutuk 72. Pasiente HIV/SIDA hemu ai-moruk iha vida tomak. Ami halo atendimentu ba totál pasiente HIV/SIDA ne´ebé halo tratamentu ativu ne´e,” Diretór Ezekutivu Klínika Bairru Pité, Kewen Robert Lu pereira, hateten ba Agência Tatoli iha Klinika Bairru Pité, tersa ne’e.

Husi pasinte sira-ne´e, ba hirak ne´ebé halo tratamentu ne’e ema na’in-lima (5) mak la ativu ka abandona halo tratamentu ba sira-nia moras no daudaun ne´e profisionál saúde klinika Bairru Pité buka tuir hela.

Diretór ne’e garante katak ai-moruk ba pasiente ho HIV/SIDA ne’e iha stock sufisiente atu halo atendimentu ba moras sira-ne’e.

“Dala barak mak sira nakar lakohi mai hemu ai-moruk, maibé ita kontinua buka tuir pasiente sira hodi bele hemu nafatin. Labele para konsumu ai-moruk,” nia dehan.

Ema moras ho HIV/SIDA ne’ebé hemu ai-moruk rutina, maibé husik fali halo tratamentu, hetan kondisaun grave (Drop) ba saúde, tanba ne’e mak tenke buka tuir.

Pasiente sira-ne’ebé halo tratamentu iha Klinika Bairru Pité, profisionál saúde sira buka sira-nia identidade ka dadus kompletu husi pasiente sira hanesan hetan kontatu no kartaun eleitorál.

“Kuandu sira la mai ona, fulan rua ka tolu la mai halo tratamentu, ami buka tuir ema na’in-lima ne´e la halo tratamentu, no hetan ema na’in-tolu fila tratamentu, rua mak seidauk,” nia hateten.

Jornalista : Jesuína Xavier

Editór       : Cancio Ximenes

iklan
iklan

Leave a Reply

iklan
error: Content is protected !!