DILI, 22 maiu 2024 (TATOLI)—Institutu Nasionál Estatístika Timor-Leste, Institutu Públiku (INETL, I.P), lansa mensál relatóriu mensál mudansa persentajen Índise Presu Konsumidór (IPK) abríl 2024 nian, ne’ebé hatudu grupu hotu sa’e ba +0,4%, kompara ho marsu 2024 tun ba -0,2%.
“Mudansa presu grupu hotu sa’e ba +0,4% tanba hetan kontribuisaun husi grupu hahán no bebida la’ós alkólika +0,6%, saúde +3%, uma +0,3%, enkuantu ekipamentu no manutensaun mobiliáriu uma-laran +0,1%,” refere nota ne’ebé Agência Tatoli asesu, kuarta ne’e.
Grupu alkólika no tabaku -0,1% sai hanesan mudansa kontráriu ba inflasaun grupu hotu. Grupu hahán no bebida la’os alkólika sa’e +0,6% tanba hetan impaktu maioria husi sub grupu foos +2,2%, modo tahan +0,7% no susu-been, keiju no manutolun +1,6%.
Notísia relevante : IPK grupu hotu tun ba -0,2% iha marsu 2024
Ba sub-grupu mina no bokur nian -1,2%, masin midar, marmelada, banibeen, xokolate no hahán midar -1,1%, kafé, xá, no kokoa -0,4%, na’an -0,1% sai hanesan mudansa kontráriu ba inflasaun grupu hahán no bebida la’os alkólika.
Mudansa persentajen IPK anuál sa’e +3,4% kompara entre abríl 2024 ho abríl 2023, ne’ebé hetan kontribuisaun husi grupu hahán no bebida la’ós alkólika +6,4%, edukasaun +2%, rekreasaun no kultura +1,6%, saúde +2.3%, hatais no sapatu +0,3% ba anuál abríl 2024.
Grupu alkólika no tabaku -1,1%, transporte -1,1%, ekipamentu no manutensaun mobiliáriu uma-laran -2,1%, uma -0,2%, no komunikasaun -0,2% sai hanesan mudansa kontráriu ba inflasaun grupu hotu ba anuál abríl 2024.
Inflasaun tradeable sa’e +0,5% no non-tradeable mós sa’e +0,2% iha mensál, kompara entre abril 2024 ho marsu 2024.
Inflasaun tradeable sa’e +4,5% no on-tradeable mós sa’e +0,6% iha anuál, kompara entre abríl 2024 ho abríl 2023.
Jornalista : Arminda Fonseca
Editora : Julia Chatarina
