iklan

NASIONÁL

MAPPF distribui fini animál ba grupu 200 iha territóriu nasionál

MAPPF distribui fini animál ba grupu 200 iha territóriu nasionál

Haki'ak karau. Imajen espesiál

DILI, 22 maiu 2024 (TATOLI) – Ministériu Agrikultura, Pekuária, Peska no Floresta (MAPPF) liuhusi Diresaun Nasionál Pekuária no Veterinária (DMPF) kontinua distribui animál hanesan Karau vaka no karau Timur, kuda, bibi, fahi no manu hamutuk 1.000 ba grupu 200 hodi hasa’e produsaun animál iha rai-laran.

Diretór Jeral Pekuária no Veterinária, Carlos Antonio Amaral, hateten, polítika diresaun nian hodi kontinua halo distribuisaun animál ba komunidade sira iha territóriu nasionál ne’e atu tulun komunidade sira hodi hasa’e produsaun animál iha rai-laran atu nune’e bele apoiu rendimentu ba kada família no grupu sira.

“Ita distribui animál hanesan Karau vaka, karau Timur, kuda, bibi, fahi no manu ne’e tanba ita atu hasa’e produsaun iha rai-laran. Ba karau de’it kada grupu ita distribui par ida depois grupu sira ne’e haki’ak to’o tinan haat kuandu tau ona oan rua sira tenke devolve ida grupu sira seluk hodi nune’e bele kontinua hatutan nafatin ba oin,” Diretór Carlos ba TATOLI iha ninia servisu fatin edifísiu MAPPF, Comoro, ohin.

Diretór ne’e haktuir katak distribuisaun animál ba grupu sira ne’e ho intensaun ida atu hasa’e rendimentu ba komunidade sira hodi hadi’a ekonomia família nian, nune’e mós atu kria kampu traballu  ba grupu sira hodi nune’e setór agrikultura ne’e rasik bele dezenvolve ba to’o iha fatin hotu-hotu iha territóriu nasionál ne’e rasik

Tuir nia katak animál ne’ebé diresaun Pekuária distribui ba grupu 200 iha territóriu nasionál ne’e konsidera nu’udar animál ne’ebé fasil atu konsumu hahán lokál sira ne’ebé maka komunidade iha ba fahi no manu sira nia hahán hanesan ema, presiza batar ai-farina, no foos entaun fasil atu hetan. Depois ba karau kuda no bibi, sira han de’it, entaun fasil mós atu hetan iha komunidade nia leet ho nune’e maka diresaun distribui animál sira ne’e atu la prejudika grupu sira.

Entretantu, polítika distribuisaun animál ne’ebé nonu governu liuhusi Ministériu Agrikultura, Pekuária, Peska no Floresta halo ne’e ho intensaun atu hasa’e rendimentu, atu nune’e molok tinan lima produsaun animál ne’ebé diresaun distribui ba grupu sira ne’e bele atinje ona 100%.

Notísia relevante:Diresaun Pekuária distribui fini animál ba grupu 15

Jornalista: Tomé Amado

Editór: Rafael Ximenes de A. Belo

iklan
iklan

Leave a Reply

iklan
error: Content is protected !!