DILI, 23 maiu 2024 (TATOLI) – Polísia Nasionál Timor-Leste (PNTL) liuhosi ekipa konjunta, kompostu hosi Departamentu Investigasaun Kriminál (DIK), Departamentu Informasaun Polísia, Unidade FALINTIL no J2 inklui SNI, asegura sidadaun na’in-rua ne’ebé suspeita hadau sidadaun feto ida-nia telefone hodi rezulta Nituchia Fangidae lakon vida, iha area Praia dos Cuqueiro iha tersa (21/5) horikalan.
Kazu ne’e akontese iha kuarta kalan, bainhira sidadaun feto ida ho nia oan Nituchia Fangidae tinan hitu, kondús motorizada liuhosi area Kampung Alor, derepente iha suspeitu na’in-haat ho motorizada tuir sidadaun feto ho nia oan nia hosi kotuk atu hadau sira-nain rua nia telefone ne’ebé tau iha motór oin.
Asaun ne’ebé mak suspeitu sira halo konsege hadau sidadaun feto ne’e nia telefone nune’e sidadaun feto ne’e duni tuir kedan suspeitu na’in-haat ne’ebé hadu telefone, to’o iha Praia dos Cuqueiros loja Sehara nian iha sidadaun feto ne’e tenta hadau hikas nia telefone maibé labele tanba suspeitu ida ho motór hosi kotuk lori ai-fai ba motór ne’ebé sidadaun feto ne’e lori, too ikus motór ne’ebé sidadaun feto ne’e kondús monu tun ba rai hodi rezulta sidadaun feto ho nia oan monu ba rai hodi to’o rezulta kanek grave.
Maibé iha asidente ne’e, sidadaun feto ne’e ho kondisaun grave tanba hetan pankada makas no halo hela tratamentu enkuantu nia oan Nituchia Fangidae mak lakon vida iha Hospitál Nasionál Guido Valadares Dili tanba hetan pankada makas.
Ho kazu ida ne’e, iha kinta (23/5) ohin, tuku 04:00 madrugada ekipa konjunta deteta suspeitu na’in-ida ne’ebé envolve kazu ida-ne’e no deskobre sira nian paradeiru, suspeitu na’in-rua ne’e iha Lahane no suspeitu na’in-rua lakopera no tenta halai hosi prosesu, nune’e halo ekipa konjunta duni tuir suspeitu ne’e asegura iha área Matadoro.
Enkuantu, suspeitu na’in-ida seluk ekipa konjuntu kaer tan suspeitu nain ida iha área Bairro-Pite Gan 45. No suspeitu sira ne’e ekipa konjunta lori ba entrega iha Departamentu Investigasaun Kriminál hodi submete ba prosesu identifikasaun.
“Suspeitu na’in rua ne’e agora daudaun ekipa konjunta lori ona ba Departamentu Investigasaun Kriminál hodi submete ba prosesu identifikasaun. Kazu ne’e PNTL rejistu ho NUC 0125/24.PNSIC no suspeitu sira konsidera envolve krime Furtu Agravadu ne’ebé previstu iha artigu 252 iha Kódigu Penál Timor-Leste”, hateten hosi Komunikadu ne’ebé Tatoli asesu kinta, ohin.
Hosi komukikadu ne’e sita, aleinde PNTL asegura suspeitu na’in-rua, polísia mós asegura evidénsia motorizada lima ne’ebé mak durante ne’e suspeitu sira uza hodi hadau ema-nia telefone.
Jornalista: Natalino Costa
Editór : Zezito Silva
