DILI, 24 Maiu 2024 (TATOLI)–Empreza Sali-Magu Unipessoál Lda, kinta (23 maiu 2024) horisehik, hatama ai-moruk kontentór neen (6) ho item 40 ba Institutu Nasionál Farmasia no Produtu Medikamentu (INFPM), iha Kampung Alor, Dili.
Notisia Relevante: INFPM deklara Sali-Magu sei hatama ai-moruk item 88 iha janeiru
Diretór Empreza Sali-Magu Unipessoal Lda, Sansão Gomes, hateten iha kontentór sira-ne’e ai-moruk konsumavel no medikamentu nesesaria, vital no esensiál.
“Kontentór hamutuk neen tama iha portu Tibar, haat mai uluk ona INFPM maibé tolu ne’e soru-been hotu tanba soru-been ne’e menus. Restu ne’e ai-moruk hotu. Kuaze item 40,” Diretór Empreza Sali-Magu Unipessoal Lda, Sansão Gomes, hateten ba Agência Tatoli, liuhosi telefónika, sesta ne’e.
Dirijente ne’e hateten produtu medikamentu sira tama iha portu no tuir prosesu alfandegarismu no hatama mai iha INFPM horseik. Ai-moruk sira ne’ebé tama mai hosi nasaun Indonésia no Arabia Saudita.
Nia explika ai-moruk sira sei tama tan iha semana oin, tanba medikamentu sira tama fazeadamente no sei termina iha fulan jullu.
“Ami nia orariu ho fabrika ne’e remata iha jullu, tanba ne’e sei termina hatama ai-moruk iha jullu”, nia hateten.
Emprezariu ne’e hateten, Sali-Magu hatama total ai-moruk item hamutuk 400 ba iha INFPM no agora hela ai-moruk item 500.
Nia dehan, dehan públiku kestiona kompra ai-moruk ba iha INFPM maibé Sali-Magu sosa ai-moruk ba INFPM produtu konsumavel mak barak hanesan soru-been no reajente.
“Ami kompra ai-moruk ho totál hamutuk item 900, barak liu mak konsumavel hanesan soru-been no reajente. Ai-moruk lolos ne’e item 300 de’it. Ema jeneraliza katak ai-moruk item 900 ne’e ai-moruk hotu, la’e ida, maioria ne’e produtu konsumavel no reajente iha ami-nia kontratu,”, nia lamenta.
Bainhira jornalista Agência Tatoli konfirma asuntu ida-ne’e ba Diretór Ezekutivu Institutu Nasionál Farmasia Produtu Medikamentu (INFPM), Brigido Simão Dias de Deus, maibé diretór ne’e la hatán.
Notisia Relevante: MS ajudika direta Empreza SALI-MAGU sosa medikamentu
Jornalista : Jesuína Xavier
Editór : Cancio Ximenes
