DILI, 24 maiu 2024 (TATOLI)–Hosspital Nasionál Guido Valadares (HNGV) liuliu iha sala emerjénsia ne’e, profisionál saúde sira halo atendimentu fó liu prioridade ba pasiente moras kardiovaskulár, asidente no iis-boot, la’os ba pasiente sira hotu-hotu ba iha emerjénsia hanesan kosputadu iha loron tolu ka haat ne’e.
Notísia Relevante: Ai-moruk item rua mai ona no sei hatama tan kontentór haat
Espesialista iha Departamentu Emerjénsia iha HNGV, Costódio Alves de Jesus, hateten iha emerjésia ne’e utiliza triajen pasiente sira-nian tuir gravidade moras ne’ebé aprezenta iha emerjénsia.
Tanba, nia dehan, dalabarak pasiente sira mai hakarak sai lista prioridade hotu ba iha atendimentu, maibé profisionál saúde sira tenke halo observasaun adekuadu, molok halo atendimentu.
“Problema moras fuan kategoria lista mean, ita tenke atende uluk no depois família mak rejistu nia naran. Iis-boot ne’e enefermeiru no médiku tenke atende hodi kontrola. Se pasiente fuan moras tenke avalia,” Espesialista Costódio Alves, hateten ba Agência tatoli liuhosi programa “Entrevista Eskluziva” ho topiku “Servisu Emerjénsia iha Hospitál Nasionál Guido Valadares”, iha Bidau, sesta ne’e.
Nia esplika, se pasiente sira mai la’o mesak ho kondisaun kór kinur ka matak, profisionál saúde sira halo monitorizasaun tanba bele kór hirak ne’e bele ba iha kategoria lista mean, bainhira iha situasaun ka lista hein nian.
Tuir nia, pasiente sira hela iha sala emerjénsia durante oras lima (5) ka neen (6) hodi teste diagnosa sira hodi kontinua hetan internamentu ka fila ba uma, tanba pasiente sira-ne’ebé kategoria kinur hein oras ida (1) no matak oras rua (2) iha sala emerjénsia hodi hetan atendimentu.
Diretora Klinika iha Hospitál Nasionál Huido Valadares (HNGV), Ana Maria P. Magno, hateten servisu emerjensia simu pasiente kada fulan neé pasiente hamutuk 6.000 ho kategoria tama iha lista mean, kinur no matak.
“Servisu departamentu emerjensia fó atendimentu kada fulan ema rihun neen no atendimentu esternál ambulante 9.000a,” nia dehan.
Jornalista : Jesuína Xavier
Editór : Cancio Ximenes
