DILI, 27 maiu 2024 (TATOLI)—Prezidente Autoridade Portuáriu Timor-Leste, Institutu Públiku (APORTIL, I.P), José de Oliveira Leong, sei foku ba prioridade tolu durante mandatu.
“Ita ko’alia planu prioridade ne’e barak, maibé iha ami-nia mandatu sei foku ba prioridade tolu mak hanesan hadi’a sistema, reseita no rekursu umanu,” Prezidente Konsellu Administrasaun APORTIL, I.P, José de Oliveira Leong, informa ba Agência Tatoli, iha ninia knaar fatin, Portu Dili, Colmera, segunda ne’e.
Ekipa téknika husi APORTIL daudaun prepara hela planu ba orsamentu tinan oin, nune’e bele kria kondisaun hodi bele hetan reseita.
“Bainhira laiha kondisaun di’ak reseita mós sei laiha. Mudansa ba sistema ne’e hahú husi finansa, administrasaun finansa no operasionál sira ne’e hotu tenke integradu,” nia akresenta.
Notísia relevante : JICA entrega rezultadu finál planu mestre dezenvolvimentu estratéjiku portuáriu ba APORTIL, I.P
Aleinde ne’e, presiza mós aumenta rekursu umanu hodi koloka ba portu rejionál sira hanesan Com Lautém, Beaço, Cairabela, Suai no Betano.
APORTIL, I.P daudaun iha rekursu umanu hamutuk 100-resin.
Membru Konsellu Administrasaun APORTIL, I.P ne’ebé kompostu husi Prezidente José de Oliveira Leong, Vogal I Julio Saldanha Barreto no Vogál II Leandro de Sena, simu pose iha loron 14 maiu 2024, ba períodu tinan-tolu (2024 to’o 2027).
Jornalista : Arminda Fonseca
Editora : Julia Chatarina
