POLÍTIKA

PN hato’o votu pezár ba falesimentu antigu Vise PPN “Meta Mali”

PN hato’o votu pezár ba falesimentu antigu Vise PPN “Meta Mali”

Antigu Ministru Asuntu Kombatente Libertasaun Nasionál (MAKLN), Júlio Sarmento da Costa “Meta Mali”. Imajen Tatoli/Egas Cristóvão.

DILI, 28 maiu 2024 (TATOLI)—Parlamentu Nasionál (PN), tersa ne’e liuhusi reuniaun plenária aprova votu númeru 10/2024 pezár ba falesimentu antigu Vise Prezidente Parlamentu Nasionál (PPN), Júlio Sarmento da Costa ‘Meta Mali’.

Notísia Relevante: Deputadu lejislatura da-neen hato’o sentidu kondolénsia ba falesimentu antigu Vise PPN ‘Meta Mali’

“Rezultadu votasaun a-favór 53, kontra no abstensaun zero, nune’e votu pezár pasa,” Prezidente Parlamentu Nasionál, Maria Fernanda Lay, hato’o iha sala plenária Parlamentu.

Júlio Sarmento da Costa ‘Meta Mali’ hakotu iis iha 24 Maiu tinan ne’e iha Hospitál  Nasionál Guido Valedares (HNGV) ho idade 65. Matebian moris iha 20 Jullu 1959 iha suku Horaiquic, postu Maubisse, munisípiu Ainaro, oan husi José Pedro da Costa ho Crismina Cardoso, iha maun-alin na’in-hitu (7) no matebian hanesan oan daruak.

Saudozu kaben ho Perpétua Maria Estela dos Santos Maia Sarmento, iha oan na’in-lima (5), ne’ebé kompostu husi mane na’in-tolu (3) no feto na’in-rua (2).

Iha tempu rezisténsia kontra okupasaun Indonézia, saudozu asume kargu xefe OPJT-Zona Maucoli (1975), sub-xefe edukasaun no komandante pelutaun FALENTIL (1976), sekretáriu zona Maubisse (1981), vise sekretáriu Odir Ramelau (1984-1995) no kolabora Ramelau rejiaun IV (1997-1999).

Partisipa ativamente mós iha organizasaun oioin ne’ebé kria ba luta husi libertasaun nasionál, nu’udar fundadór no sekretáriu jerál Organizasaun Sagrada Coração de Jesus/Colimau 2000 no membru Organizasaun relijiozu sira seluk.

Estadu Timor-Leste rekoñese saudozu nia tempu dedikasaun eskluziva ba luta libertasaun nasionál, atribui eskalaun II grau 2 ba tempu ida enkuadradu iha períodu tinan 15-19 iha luta.

Saudozu frekuenta ensinu pre-sekundáriu iha Ainaro no estudu sekundáriu iha Becora, Dili.

Durante iha tempu Indonézia asume funsaun segundu asistente diretór diresaun relasaun públika iha administrasaun Indonézia iha Dili.

Hafoin restaurasaun independénsia saudozu hanesan fundadór mós ba Partidu Demokrátiku (PD) no eleitu terseiru Vise Prezidente PD ba periódu 2017-2022.

Saudozu asume mós kargu sira seluk hanesan Sekretáriu Estadu asuntu Kombatente Libertasaun Nasionál iha Governu konstituisionál da-lima (V) iha 2012-2015, Deputadu bankada parlamentár PD no vise Prezidente Parlamentu Nasionál iha lejislatura dahaat iha 2017-2018 no Ministru ba asuntu Kombatente Libertasaun Nasionál iha oitavu Governu konstituisionál iha 2020-2023.

Nune’e, Parlamentu Nasionál reúne iha sesaun plenária, expresa ninia profundu pezár ba falesimentu Júlio Sarmento da Costa ‘Meta Mali’, enderesa sentida kondolénsia ba saudozu nia kaben ho oan ki’ak sira, ba Partidu Demokrátiku (PD) ho kolega enlutada.

Votu pezár ne’e aprezenta husi Deputadu proponente Duarte Nunes (CNRT), Aniceto Longuinhos Guterres (FRETILIN), Manuel Henrique Noronha (PD), António Verdiál de Sousa (KHUNTO), Maria Angelina Sarmento (PLP).

Notísia Relevante: Antigu ministru asuntu kombatente libertasaun nasionál “Meta Mali” hakotu iis iha HNGV

Jornalista : Nelson de Sousa

Editór       : Cancio Ximenes

 

iklan
iklan

Leave a Reply

iklan
error: Content is protected !!