EKONOMIA, HEADLINE

Empreza Tsuneishi propoin investimentu millaun $300 no kampu serbisu ba ema 4.000

Empreza Tsuneishi propoin investimentu millaun $300 no kampu serbisu ba ema 4.000

Ekipa konjunta kompostu husi TradeInvest Timor-Leste, empreza Tsuneishi Shipbuilding C. Ltd, EDTL, E.P, Terra no Propriedade munisípiu Manatuto no ADB halo verifikasaun ba utilizasaun rai Estadu iha Laleia, segunda (19/12/2023). Imajen Tatoli/TradeInvest

DILI, 29 juñu 2024 (TATOLI)—Empreza Tsuneishi Timor Shipbuilding, Unip, Lda husi nasaun Japaun, iha tersa (28/05) aprezenta proposta investimentu ba komisaun téknika ne’ebé lidera husi Ajénsia Promosaun Investimentu no Esportasaun (TradeInvest Timor-Leste).

Objetivu aprezentasaun proposta investimentu privadu ne’e atu Governu liuhusi diresaun kompetente sira halo análiza tékniku ba empreza nia planu negósiu hodi bele aplika ba Deklarasaun Benefísiu tuir Lei Investimentu Privadu Númeru 15/2017.

“Horiseik sira mai aprezenta proposta investimentu, Governu liuhusi ekipa téknika kompostu husi diresaun relevante sira aseita sira-nia proposta atu harii indústria estaleiru iha postu administrativu Laleia, munisípiu Manatuto, ne’ebé faze primeiru kapasidade produsaun ró-ahi hamutuk 10 to’o 12, ne’ebé kada tinan faze I, II no III sei investe tan otel, eskola no ospitál ho totál kapitál investimentu millaun $300 no sei fó oportunidade serbisu ba ema 4.000,” Diretór Promosaun Investimentu TradeInvest, Ezaquiel Babo, informa ba Agência Tatoli, via telefónika, kuarta ne’e.

Notísia relevante : Empreza Tsuneishi Shipbuilding atualiza progresu rejistu investimentu ba PM

Nia haktuir, iha aprezentasaun ne’e Governu aseita ona sira-nia planu investimentu maibé husu ba empreza atu priexe rekezitu tékniku no legál ne’ebé vigór iha Timor-Leste.

Rekezitu sira-ne’ebé empreza prienxe mak hanesan tenke rejista atividade iha Servisu Rejistu no Verifikasaun Emprezariál, Institutu Públiku (SERVE, I.P), Autoridade Nasionál Lisensa Ambientál (ANLA) no sei kompleta rekezitu sira seluk tan.

“Agora empreza hahú halo estudu viabilidade atubele konklui akordu hodi hetan sertifikadu lisensa ambientál, nune’e bele hahú konstrusaun,” nia akresenta.

Aprezentasaun proposta investimentu ne’e lidera husi Diretór Ezekutivu TradeInvest Timor-Leste, Arcanjo da Silva no reprezentante instituisaun relevante sira hanesan SERVE, I.P, Autoridade Tributária, Autoridade Aduaneiru, Ministériu Planeamentu no Investimentu Estratéjiku (MPIE), Ministériu Obra Públika (MOP), Eletricidade de Timor-Leste, Empreza Públika (EDTL, E.P), IGT, Ministériu Komérsiu no Indústria (MKI), Servisu Migrasaun, Institutu Kualidade Timor-Leste, Institutu Públiku (IQTL, I.P), Ministériu Turizmu no Ambiente (MTA) inklui Terra Propriedade.

Jornalista     : Arminda Fonseca

Editora          : Julia Chatarina

iklan
iklan

Leave a Reply

iklan
error: Content is protected !!