HEADLINE, MUNISÍPIU, OÉ-CUSSE (RAEOA), POLÍTIKA

Governu selebra kontratu ho ofisiál apoia suku na’in-72 iha Oé-Cusse

Governu selebra kontratu ho ofisiál apoia suku na’in-72 iha Oé-Cusse

Prezidente Autoridade RAEOA, Rogério Tiago Lobato akompaña husi MAE, segunda ne'e, selebra kontratu ho funsionáriu ofisiál suku hamutuk 72 iha Oé-Cusse. Imajen Tatoli/Abílio Elo Nini.

OÉ-CUSSE, 03 juñu 2024 (TATOLI) – Governu liuhusi Ministériu Administrasaun Estatál (MAE), hamutuk ho Autoridade Rejiaun Administrativa Espsiál Oé-Cusse Ambeno (RAEOA) segunda ohin, selebra asina kontratu termu sertu ho funsionáriu ofisiál apoia suku hamutuk na’in-72 hodi apoia serbisu ba suku 18 no sub-rejiaun haat iha Oé-Cusse Ambeno.

“Ohin asina kontratu termu sertu ho ofisiál kada suku na’in-haat ho Prezidente Autoridade RAEOA, atu kesi sira, durante sira-nia mandatu serbisu hodi fó asisténsia imediata ba serbisu suku, ne’ebé ami husi MAE sei fasilita formasaun, oinsá mak ita-boot sira bele hala’o serbisu ho di’ak,” Diretór Jerál Desentralizasaun Governu Lokál hosi MAE, António Guterres, iha otél Ambeno.

Notísia relevante: Governu sei rekruta ofisiál na’in-tolu iha 2024 atu apoia administrasaun suku

Nia epslika, bazea ba enkuadramentu legál, dekretu-lei númeru 31, hatuur nanis kona-bá serbisu administrasaun suku ho pozisaun na’in-haat, komposta husi sekretáriu administrasaun suku, ofisiál administrasaun suku, ofisiál finansa no ofisiál asuntu sosiál suku nian.

“Sira na’in-tolu ne’e sei simu orientasaun husi sekretáriu administrasaun suku no tutela direitamente ba xefe suku, atu fó asisténsia kona-bá intermu serbisu suku nian, oinsá atu halo jestaun administrasaun suku, rekolla dadus populasaun monografia demografia no identifika nesesidade ne’ebé afeta komunidade sira, liuliu ba dezastre naturál, asuntu sosiál, bolsa da mãe no idozu-invalidéz, inklui serbisu saúde ba mortalidade,” nia katak.

Nia fó-sai, bainhira sekretáriu suku iha impedimentu ruma, moras ou buat seluk ofisiál administrasaun mak substitui no karta substituisaun sei prepara husi xefe suku no hato’o koñesimentu ba iha orgaun másimu Autoridade RAEOA liuhusi administradór postu administrativu.

Notísia relevante: MAE diálogu ho komunidade Monemeko Oé-Cusse prepara sai suku iha 2024

Diretór Jerál ne’e, apela ofisiál 72, atu haknaar-aan iha suku tuir regra, pontualidade tama serbisu, hahú horas 08:00 to’o horas 12:00 fila ba uma, tama fali iha oras 13:30 tenke fila mai serbisu to’o lokraik 17:30 mak foin sai ba uma.

Prezidente Autoridade RAEOA, Rogério Tiago Lobato,  agradese ba polítika Governu, tanba prezensa ofisiál sira iha suku importante atu haforsa serbisu iha nível suku to’o aldeia sira.

“Ema sira-ne’ebé kontaktu direitu ho komunidade, ne’e duni ofisiál foun sira-ne’e, imi-nia funsaun ne’e importante tebes, ita bele halo polítika oinoin maibé polítika ne’e latún no laiha implementasaun to’o iha nivél kraik, povu ne’e hanesan namlele de’it iha leten, ne’e duni, xefe suku no aldeia sira imi-nia funsaun ne’e importante, espera katak, RAEOA sei halo kolaborasaun nafatin ho Ministériu Administrasaun Estatál, atu ita aprende ho kona-bá saida mak mak seidauk hatene.”

Hilário Vírgilio Lafo nu’udar Sekretáriu suku Costa, sub-rejiaun Pante Makasar, agradese no promete sei hala’o serbisu tuir orientasaun suku ba interese públiku.

“Agradese ba Governu, ohin selebra ona kontratu ho ami, ne’ebé ami sei hala’o serbisu iha suku tuir matadalan suku nian, fó atendimentu ba ema hotu, laiha diskriminasaun maibé sei serbí komunidade iha nível suku to’o aldeia no bairru,” nia promete.

Notísia relevante: FOTO ATUÁL: Selebrasaun kontratu funsionáriu ofisiál suku iha RAEOA

Entretantu, kona-bá pozisaun ofisiál administrasaun suku ba kategoria pesoál serbisu administrasaun suku, kria bazea ba dekretu-lei númeru 81/2023, 11 outubru, lokál serbisu iha sede suku, saláriu mensál $150 kada fulan, modalidade kontratu termu sertu, durasaun fulan- ualu (períodu provatóriu fulan-rua), posibilidade bele estensaun bainhira iha avaliasaun pozitiva.

Pozisaun ofisiál finansa suku kategória pesoál serbisu administrasaun suku, kria bazeia ba dekretu-lei númeru 81/2023, 11 outubru, lokál serbisu iha sede suku, saláriu mensál $150 kada fulan, modalidade kontratu termu sertu, durasaun fulan-ualu (períodu provatóriu fulan-rua), ho posibilidade bele estensaun bainhira iha avaliasaun pozitiva.

Pozisaun sekretáriu administrasaun suku, kategória pesoál serbisu administrasaun suku, kria bazeia ba dekretu-lei númeru 81/2023, 11 outubru, saláriu mensál $170 kada fulan, modalidade kontratu termu sertu, durasaun fulan-ualu (períodu provatóriu fulan-rua), ho posibilidade bele estensaun bainhira iha avaliasaun pozitiva.

Nune’e mós pozisaun ofisiál asuntu sosiál suku nian, kategória pesoál serbisu administrasaun suku, kria bazeia ba dekretu-lei númeru 81/2023, 11 outubru, saláriu mensál $150 kada fulan, modalidade kontratu termu sertu, durasaun fulan-ualu (períodu provatóriu fulan-rua), ho posibilidade bele extensaun bainhira iha avaliasaun pozitiva.

Jornalista: Abílio Elo Nini

Editór: Evaristo Soares Martins

iklan
iklan

Leave a Reply

iklan
error: Content is protected !!