iklan

HEADLINE, INKLUZAUN SOSIÁL

ONG Belun no Plan Internasionál fó formasaun ba funsionáriu CNE-STAE

ONG Belun no Plan Internasionál fó formasaun ba funsionáriu CNE-STAE

Diretór ONG Belun, Luís da Costa Ximenes. Imajen Tatoli /Egas Cristóvão

DILI, 04 juñu 2024 (TATOLI)—Organizasaun Naun Governamentál (ONG) Belun hamutuk ho Plan Internasionál, tersa ne’e, fó formasaun ba funsionáriu Komisaun Nasionál Eleisaun (CNE, sigla portugés) no Sekretariadu Tékniku Administrasaun Eleitorál (STAE) hamutuk 20-resin.

Diretór Belun, Luís da Costa Ximenes, hateten, formasaun ne’e realiza tanba Plan Internasionál hamutuk ho Belun halo parseria ho órgaun eleitorál sira hodi imlementa atividade formasaun ba iha funsionáriu sira hanesan diretór, tékniku no jestór sira husi munisípiu Aileu, illa Ataúro, Dili, Ermera, no Viqueque.

“Formasaun ne’e durante loron-haat hahú ohin no sei ramata iha loron 07 juñu, ne’ebé durante formasaun ne’e tópiku ne’ebé sei ko’alia kona-ba igualdade jéneru, komunikasaun líder no apoiu tékniku sira seluk hanesan ba iha jestaun finansa,” Diretór Belun informa iha salaun CNE, Caicoli.

Notísia relevante : ONG Belun identifika GAM no GAR halo atividade sosiál barak iha sosiedade

ONG Belun nu’udar organizasaun nasionál sosiedade sivíl ne’ebé harii iha tinan 2004, ne’ebé hala’o ninia serbisu foku ba pilár prinsipál tolu mak hanesan prevensaun konflitu no promove dame, dezenvolve Kapasidade komunidade inkluzivu no Peskiza, dezenvolvimentu Polítika no advokásia.

Belun nia vizaun mak sosiedade Timor-Leste iha kbiit kreativu no krítiku ba dezenvolve pás ba demokrasia ne’ebé sustentável ne’e misaun atu serbí sosiedade inkluzivu, prevene konflitu, promove dame ho integridade no kreatividade.

Iha fatin hanesan, Responsável programa Eleisaun Demokrátiku no Inkluzivu iha Plan Internasionál, Adriana Garcia, hateten, inisiativa formasaun ne’e tanba Plan Internasionál iha komprimisiu boot atubele suporta partisipasaun ema ho deversidade inklui feto, joven no defisiénsia iha área hotu.

Iha asuntu ne’e, foka ba asuntu eleisaun ne’ebé demokrátiku no inkluzivu, entaun Plan Internasionál ho parseiru Belun Asosiasaun Defisiénsia Timor-Leste (ADTL) Justisa Pas Integridade Kriasaun, Movimentu Feto Foin-sa’e, CAUSUS no Pátria hetan fiar husi Uniaun Europeia implementa projetu eleisaun Demokrátiku no Inkluzivu Timor-Leste durante tinan-rua ho totál orsamentu $600.000.

“Entaun iha parseiru rua ADTL no Belun ami implementa tinan-rua no parseiru haat sira seluk implementa ho durasaun implementasaun durante fulan-10,” nia informa.

Formasaun ne’e nia alvu sei ba munisípiu hotu no ONG Belun realiza ona formasaun iha Baucau, Viqueque, Lautém, Manatuto, Covalima, Manufahi, Ainaro.

Prezidente CNE, José Belo, hateten, formasaun ohin ne’e importante ba funsionáriu CNE no STAE hodi prepara-an di’ak liután ba serbisu hotu iha terrenu.

“Formasaun ne’e importante ba ita-nia funsionáriu sira iha parte lideransa atubele absolve serbisu sira iha terrenu oinsá atubele asegura serbisu hotu la’o di’ak ein termu finareiru no jestaun ne’ebé di’ak no ko’alia liubá mós partisipasaun feto iha eleisaun no dezabilita sira-ne’ebé presiza trata espesiál,” nia tenik.

Tanba ne’e, presiza formasaun atubele intera didi’ak husi CNE no STAE nia funsionáriu atu sira bele prepara-an di’ak liután iha tempu eleisaun no hafoin eleisaun saida mak bele halo tenke iha preparasaun di’ak.

“Ita haree iha tinan 2026 to’o 2027 ne’e sei iha eleisaun barak ne’ebé mosu, tanba ne’e ita tenke prepara-an hodi hatene ona ita-nia forsa no frakeza sira hodi prepara-an di’ak liután tanba CNE no STAE nia serbisu la’ós de’it serbisu ih nasionál de’it maibé agora prepara-an atu tama ba ASEAN no membru CPLP, tanba ne’e ita-nia kualidade serbisu tenke hanesan ho sira,” nia salienta.

Jornalista     : Arminda Fonseca

Editora          : Julia Chatarina

iklan
iklan

Leave a Reply

iklan
error: Content is protected !!