DILI, 05 Juñu 2024 (TATOLI)–Arsebispu Arkidioseze Metropolitana Dili, Dom Virgílio Kardeal do Carmo da Silva, SDB, hateten delegasaun vatikanu apresia preparasaun igreja no Estadu atu simu Papa Francisco ne’ebé hala’o vizita Estadu no pastorál iha Timor-Leste hahú iha 09-11 setembru 2024.
Notísia Relevante: Ekipa Delegasaun Organizadora Vatikana halo inspesaun ba Aeroportu Comoro
Dom Virgílio Kardeál esplika, ohin, iha enkontru ikus ho delegasaun Vatikanu ninian, halo konkluzaun ba avaliasaun vizita ba Primeiru-Ministru Kay Rala Xanana Gusmão ne’e, ekipa Vatikanu fó sira-nia apresiasaun ba iha preparasaun ba buat hotu ne’ebé sira haree durante loron rua nia laran liga ho preparativu ba amu Papa nia vizita ne’e.
“Enjeral sira fó apresiasaun di’ak katak sira haree hosi lojistika no seguransa, haree katak ekipa hotu-hotu halo sira apresia kompara ho sira-nia vizita janeiru to’o mai agora. Itá hotu esforsu no hakaas aan ba ida-ne’e hatudu duni responsabilidade másimu hodi hala’o didi’ak ba preparativu hirak ne’e,” Dom Virgílio Kardeal do Carmo da Silva hateten ba jornalistas sira liuhosi konferensia imprensa, iha Motael.
Kardeál hateten, sira-nia vizita ida ne’e hatudu buat kiik-oan ne’ebé presiza halo di’ak liutan atu nune’e bele hadi’a ba fatin sira-ne’ebé Papa Francisco atu liu maibé laiha buat boot ne’ebé presiza atu hadi’a.
“Bu’at importante ida-ne’ebé sira fó hanoin ba mak oinsá mak garantia katak Amu Papa Francisco nia vizita ne’e atu sai fatin ida hakmatek. Ho Amu Papa ita ladún ladun preokupa, maibé oinsa sarani hotu-hotu bele sente fatin ne’ebé di’ak, hakmatek ho kuantidade sarani ne’ebé sei partisipa ne’e labele akontese buat ne’ebé ita la espera. Ida-ne’e mak sira fó hanoin ba ita atu oinsá kria kondisaun di’ak atu ema hotu-hotu simu hakmatek,” nia dehan.
Saúde Papa Francisco nian importante maibé fatin istóriku Tasi Tolu tenki sai fatin ba timoroan hotu hodi ema labele dudu malu no depoizde vizita la akontese buat ida ba ema hotu.
“Ida-ne’e mak importante liu buat hotu. Ida-ne’e sira fó hanoin nafatin ba ita, oinsá Amu Papa nia vizita ne’e ema hotu bele apresia, bele haree no sente no enkontru sai benefísiu espirituál ba sarani hotu,” nia hateten.
Iha fatain hanesan, Ministru Administrasaun Estatál, Tomás Cabral, hateten iha fulan tolu ikus Governu no igreja sei esforsu aan atu konklui preparasaun kona-ba vizita Amu Papa nian mai Timor-Leste.
“Ita hotu hakarak buat hotu ne’e tenki finaliza, antes loron 15 Amu atu to’o iha Timor-Leste, ne’e mak ita hotu nia hakarak. Ita-boot sira haree kareta hotu para, tanba ita hakarak kria kondisaun ida nune’e sira halo avaliasaun no sira fila, ita-nia kondisaun ne’e prienxe amu Papa nia vizita,” Ministru Administrasaun Estatal, Tomás Cabral, hateten ba jornalista sira.
Reprezentante Vatikanu nian iha Timor-Leste, Núnsiu Apóstolika, Marco Sprizzi, hateten delegasaun Vatikanu satisfeitu ho preparasaun Governu no Igreja nian iha Timor-Leste.
“Vatikanu satisfeitu ba Governu no igreja lokal noi atentu ba susesu vizita amu Papa Francisco nian iha Timor-Leste. Apresia servisu ho sira-nia laran luak no responsabilidade hanesan Primeiru-Ministru hateten, ne’ebé igreja no Governu halo hela,” Marco Sprizzi hateten.
Notísia Relevante: Papa Francisco sei vizita Timor-Leste iha 09-11 setembru 2024
Jornalista : Jesuína Xavier
Editór : Cancio Ximenes
