DILI, 06 juñu 2024 (TATOLI)–Prezidente Autoridade Munisípiu (PAM) Ermera, José Martinho dos Santos Soares, informa, Eskola Ensinu Báziku 20 de Agosto Ermera la simu profesór bolsa kandidatu destakadu husi Ministériu Edukasaun (ME) tanba simu lamentasaun husi profesór voluntáriu.
“Sira voluntáriu ne’e mak laran moras fali, maibé ha’u halo ona intervensaun katak se nia lakohi simu profesór sira-ne’e, hateten ba nia katak nia tenke halo deklarasaun, nune’e ba oin ami labele haruka tan profesór ba iha eskola ne’ebá. Eskola ne’e mak Eskola Ensinu Báziku 20 de Agosto, iha suku poetete, postu administrativu Ermera, munisípiu Ermera,” PAM Ermera informa ba Agência Tatoli, iha salaun Komisaun Nasionál Eleisaun (CNE, sigla portugés), Caicoli, kinta ne’e.
PAM Ermera dehan, tanba eskola 20 de Agosto lakohi simu profesór destakadu, nune’e PAM hamutuk ho Servisu Eduksaun munisípiu Ermera deside destaka fali profesór iha eskola seluk ne’ebé presiza.
“Iha momentu ne’ebá, Servisu Edukasaun Munisipál mai fó hatene ha’u katak, só eskola ida-ne’e mak profesór voluntáriu lakohi simu profesór bolsa kandidatu ne’e. Nia lori motór soke fali nia (manorin) tanba nia la simu, ne’e mak ha’u dehan se nia lakohi simu tau profesór kandidatu ne’e ba fatin seluk, maibé hateten ba ida voluntáriu ne’e katak ba oin ami sei la koloka tan profesór seluk ba, maibé ita-boot ninia atitude ne’e hahalok kriminál, aban bain-rua nia impaktu ne’e ba alunu sira, ami la koloka profesór ba iha ne’ebá se mak atu hanorin estudante sira ne’e,” nia tenik.
Notísia relevante : Antigu profesór kontratadu husu ME konsidera rezolusaun PN
PAM nia pozisaun ba asuntu ne’e maka nafatin la’o tuir prosedur ME nian.
“Se sira lakohi rona malu, to’o ona iha ha’u-nia nível ne’e ita avansa ho kazu seluk krime, tanba ne’e Governu nia desizaun, la’o tuir prosedur ne’ebé Ministériu Edukasaun hasai ema hotu-hotu ba kompete hafoin nia pasa no nia prontu koloka ba iha ne’ebé tuir lei Funsaun Públika, entaun nia ema Aileu nia ba fali iha Ermera. Nune’e ita nafatin Konsellu Pais sira mak sei halo asaun hasoru nia,” nia afirma.
Tanba ne’e, nia husu ba eskola referidu atu hapara tiha profesór voluntáriu ne’ebé halo asaun ne’e.
“Labele husik nia hanorin iha ne’ebá tanba nia influénsia ladi’ak, la’ós nia iha ne’ebá mak gosta ka la gosta ema atu ba hanorin iha ne’ebá, Estadu ne’e labele funsiona hanesan ne’e ba ema ida ka rua nia gostu maibé Estadu ne’e funsiona bazeia ba lei,” PAM salienta.
Profesór sira koloka hotu ona ba Ensinu Báziku hamutuk 40-resin iha Ermera, ne’ebé profesór sira koloka hotu ona.
Tuir dadus edukasaun Ermera, Eskola Pre-Sekundária iha ualu, Tékniku Vokasionál iha neen no Pre-Eskolár iha 80-resin.
Jornalista : Osória Marques
Editora : Julia Chatarina
