PM Xanana lamenta timoroan oho malu iha Fátima, sei deside taka totál GAM-GAR
DILI, 06 juñu 2024 (TATOLI)–Primeiru-Ministru, Kay Rala Xanana Gusmão, lamenta tebes joven timoroan sira ne’ebé oho malu iha fatin santuáriu Fátima-Portugál, nune’e violénsia hirak ne’e fó ona oportunidade ba Governu tenke deside taka totál Grupu Arte Marsiál (GAM) no Grupu Arte Rituál (GAR) iha Timor-Leste.
Konfrontu ne’e akotese iha domingu foin lalais ne’e, rezulta joven mane ida naran Domingos do Rego, moris iha loron 1 Dezembru 1998, husi TulaTakeu, Munisípiu Aileu, lakon vida no na’in-lima seluk kanek grave no daudaun ne’e halo hela tratamentu saúde iha ospitál Leiria.
Notísia relevante:Governu orienta Embaixada buka solusaun ba konfrontu ne’ebé hamate Domingos do Rego iha Fátima
Ho asaun krime ne’e , Xefe Governu hirus no sente triste tanba joven sira ne’e hafo’er Timor-Leste nia naran iha Santuáriu Fátima-Portugál.
“Alerta ba joven sira hotu, liuliu ba imi sira iha li’ur ne’ebá, imi mak hatudu duni katak ita tenke taka duni arte marsiál. Iha timor ita suspende tiha problema ladun iha ona agora sira ba oho malu fali iha ema nia rai,” Xefe Governu hatete ba jornalista sira, hafoin hasoru malu ho Prezidente-Republika, Ramos Horta, iha Palásiu Prezidensiál Dili, kinta ne’e.
Xefe Governu dehan tuir informasaun ne’ebé iha katak GAM no GAR husi Persaudaraan Setia Hati Terate (PSHT) no GAR 77 mak asalta malu iha Fátima-Portugal tanba sira hatudu momoos sira nia atributu organizasaun ninian no daudaun ne’e espalla barak iha media sosiál.
“Insidente ne’ebé akontese ne’e joven sira mak tenke hatan sira nia aktu ba Polísia Judisiária iha Portugál,” Xanana hakilar ho lian maka’as.
Iha reuniaun, Konsellu Ministru (KM), kuarta (05/06) Governu haree ona oinsá Ministériu Solidariedade Sosiál no Inkluzaun (MSSI) atu transporta mate-isin hosi Portugál hodi entrega bá família.
Enkuantu kona-bá autor sira Polísia Judisiária kaptura ona balun no balun seidauk no kontinua buka autor hirak ne’e hodi submete ba prosesu investigasaun.
Daudaun ne’e, Embaixada Timor-Leste nian iha Lisboa-Portugál hamutuk ho Polísia Judisiária no mós Madre sira iha Leiria Fátima, buka hela solusaun bá problema referidu, nune’e bele halo rekonsiliasaun entre joven grupu sira.
Governu mós sei bolu ajénsia sira-ne’ebé mak fasilita joven sira bá Portugál ne’e, atu iha responsabilidade ba sira, nune’e antes haruka ba, tenki sira kumpre ba lei no regulamentu husi nasaun ne’e nian.
Alende ne’e, Primeiru-Ministru hateten Lei foun ne’ebé Portugal foin mak kria la’ós ba de’it Timoroan maibé ba ema estranjeiru hotu-hotu bainhira hakarak tama ba Portugál.
“Lei ne’e la’ós ba Timoroan de’it maibé bá ema hotu-hotu mak imigrante iha Portugal. Tanba Timoroan sira iha problema maka temi de’it Timoroan,” nia subliña.
Notísia relevante:MNEK: konfrontu iha Fátima-Portugál hatun imajen Timor-Leste iha mundu
Jornalista: Hortencio Sanchez
Editór : Florencio Miranda Ximenes
