iklan

EDUKASAUN, HEADLINE

ANAAA sujere introdús lian tetun no portugés ba kurríkulu IES

ANAAA sujere introdús lian tetun no portugés ba kurríkulu IES

Diretór Ezekutivu ANAAA, Nilton Diamantino Paiva. Imajen Tatoli/Egas Cristovão

DILI, 07 juñu 2024 (TATOLI)–Diretór Ezekutivu Ajénsia Nasionál Avaliasaun, Akreditasaun no Akadémika (ANAAA), Nilton Diamantino Paiva, sujere Institiutu Ensinu Superiór (IES) introdús lian tetun no portugés iha kurríkulu ensinu.

“Ida-ne’e importante tanba ita-nia lian nasionál ne’e mak tetun no portugés. Ida-ne’e presiza implementa iha Institutu Ensinu Superiór sira. Iha nasaun ida Institutu Ensinu Superiór tenke forte mak presiza hakruuk ba lei tanba lei mak regula,” Diretór ANAAA hateten ba Agência Tatoli, iha ninia knaar fatin, Balide, sesta ne’e.

Iha lei Ensinu Superiór iha artigu balun ne’ebé kabe ba nesesidade ensinu superiór sira, iha artigu 12 ne’e ko’alia kona-ba lian tetun no portugés.

“Ami suporta Ministériu Ensinu Superiór Siénsia no Kultura (MESSK) no mantein ami-nia pozisaun no implementa lei baze ne’e, ita halo serbisu ligadu ho serbisu ANAAA iha ensinu superiór mak lei artigu 24, númeru 2, dehan papel ANAAA hodi observa no akredita ensinu superiór sira,” Paiva akresenta.

Notísia relevante : MESSK no MJDK distribui livru ‘Rama Hana’ hamutuk 60 ba IES

Tuir ANAAA nia observasaun, utilizasaun lian iha IES sira kahur malu hela. UNTL mak uza lian tetun no portugés enkuantu balun seidauk utiliza, maibé tuir Ministru Ensinu Superiór Siénsia no Kultura la bandu ensinu superiór atu introdús lian seluk maibé baze prinsipál ne’e mak tenke tetun no portugés

“Ita haree iha institutu ensinu superiór balun ho lian inglés, ida-ne’e Ministru dehan kapas maibé tenke enkaixa tetun ho portugés iha kurríkulu ensinu superiór. Tanba ne’e kuandu lei ne’e tama vigór, maka hotu-hotu tenke hakruuk ba lei,” Nilton tenik.

Atu introdús lei ensinu superiór iha IES sira iha Timor-Leste, antes ne’e MESSK fó kursu lian portugugés ba dosente sira.

“Lei ensinu superiór pertinente tebes tanba ita haree katak lei ne’e hodi regula prosesu hotu-hotu institutu ensinu superiór sira iha ita-nia rain. Tanba buat barak mak akontese iha pasadu, ensinu superiór ne’ebé expanda nia kursu, entaun husi ne’e lei ensinu superiór mak regula,” nia dehan.

Ministru Ensinu Superiór, Siensia e Kultura, José Honório, hamutuk ho ekipa téknika sira halo aprezentasaun proposta lei Baze Ensinu Superiór nú. 5/VI(1ª) ba iha Parlamentu Nasionál iha faze jeneralidade nian.

Sesaun debate ida-ne’e ho nia rezultadu finál votasaun afavor 40, kontra 4, no abstensaun 11.

Atualmente lei ne’ebé mak utiliza hodi regula IES sira iha Timor-Leste sei kabe hamutuk lei nú. 14/2008, 29 outubru, kona-ba lei baze edukasaun, ne’ebé mak fó biban atu hodi halo mós regulasaun no Implementasaun ba programa no polítika sira iha IES.

Dezafiu maka’as ba setór ensinu superiór nian mama liu-liu ba evolusaun ne’ebé mak iha, ho nune’e MESSK rasik hakarak atu halo revizaun no separa espesifikasaun lei ida-ne’e hodi bele reforsa no hadi’a di’ak liután sistema ensinu supérior iha Timor-Leste, liu-liu atu kria kondisaun ba produsaun rekursu umanu ne’ebé kualidade atu aliña ho nesesidade merkadu no dimensaun nesesidade sira seluk.

Jornalista     : Osória Marques

Editora          : Julia Chatarina

iklan
iklan

Leave a Reply

iklan
error: Content is protected !!