Governu lansa emisaun vistu traballu iha entranjeiru no koloka adidu na’in-ualu
OÉ-CUSSE, 07 juñu 2024 (TATOLI) – Ministériu Interiór (MI) liuhusi Diresaun Jerál Serbisu Migrasaun, kinta ne’e, lansa emisaun vistu iha entranjeiru no entrega kompeténsia serbisu ba adidu na’in-ualu hodi reprezenta serbisu migrasaun iha estranjeiru.
“Emisaun vistu iha estranjeiru, liga ho vistu traballu no negósiu, ohin ita lansa ona, ita fó lisénsa atubele emite iha embaxada sira iha estranjeiru,” Ministru Interiór, Francisco da Costa Guterres, ko’alia iha ambitu lansamentu realiza iha Otel Ambeno.
Tanba polítika IX Governu atu kontrola fronteira rasik, kontrolu estranjeiru sira, tanba, dalabarak mai to’o rai-laran mak foin sira hatama aplikasaun hakarak husu vistu maibé depois mosu violasaun barak.
“Entaun liuhusi polítika ne’e bele regula katak, antes dezloka mai Timor-Leste atu husu vistu traballu ka negósiu, entaun trata antes kedas, nune’e husi parte adidu sira emite ona mak foin bele halo serbisu, no labele uza sala vistu sira-ne’e,” nia dehan.
Prezidente Autoridade RAEOA, Rogério Tiago Lobato, agradese ba polítiku Governu tanba inisiativa ne’e bele fó vistu traballu ba estranjeiru sira, molok dezloka mai Timor-Leste.
“Ne’e inisiativa importante atu evita ema sira tama iha Timor-Leste ho karáter vistu traballu, turista no negósiu nune’e evita vistu estranjeiru tanba molok tama iha timor vistu uluk iha embaixada ho adidu sira, ida-ne’e mós sei kontribui ba reseita Estadu nian,” nia katak.
Notísia relevante: Migrasaun deteta sidadaun estranjeiru na’in-42 viola vistu serbisu iha Oé-Cusse
Diretór Jerál Serbisu Migrasaun, Inspetora Xefe Polísia, Adelaide da Rosa, hateten, atu asegura planu estratéjiku Governu nian, hodi tau importánsia liu-liu kona-bá sistema kontrolu no jestaun fronteira nian.
Tanba serbisu migrasaun hola parte hanesan diresaun xave ida, hodi asegura sistema jestaun fronteira nian, asegura mós kontrolu másimu ba iha movimentu ema tama sai no hadook estranjeiru husi territóriu nasionál, tuir lei migrasaun azilu nian.
Tan ne’e, objetivu husi lansamentu ne’e atu hasa’e volume ba movimentu ema tama, sai no hela no hadook estranjeiru husi territóriu nasionál, ho vistu ne’ebé adekuadu tuir nesesidade sidadaun estranjeiru presiza.
“Signifika bainhira sidadaun estranjeiru mai hala’o serbisu profisionál ka atividade investimentu, sira sei ba iha embaixada no konsuladu RDTL iha esgtranjeiru hodi hetan vistu antes tama mai Timor-Leste, entaun ohin serbisu migrasaun avansa pasu ida ba oin, hodi tulun Governu atrai investidór sira ho mekanizmu atendimentu di’ak, fasil ba sidadaun estranjeiru sira bainhira mai investe iha Timor-Leste liuhusi embaixada no konsuladu sira,” nia dehan.
Entrega kompeténsia adidu na’in-ualu.
Entretantu, iha ámbitu ne’e Ministériu Interiór liuhusi Diresaun Jerál Serbisu Migrasaun, entrega kompeténsia serbisu ba adidu na’in-ualu hodi reprezenta serbisu migrasaun iha estranjeiru mak hanesan;
Adidu migrasaun ba Darwin, Malázia, Cina-Beijing, Singapura, Portugál, Jakarta, koloka mós asisténte adidu na’in-rua iha Bali no Atambua.
“Hanesan responsável másimu ha’u enkoraja adidu no adida sira, ohin simu ona kompeténsia delegasaun, atu hala’o serbisu ho responsabilidade no profisionál, serbí ho laran moos no fasilita ema hotu tuir lei obedese ba orden superiór no tau prioridade ba interese nasaun nian tanba ita-boot sira reprezenta nasaun ba serbisu migrasaun iha rai liur,” nia apela.
Notísia relevante: Polísia Imigrasaun Koreia Súl kaer timor-oan na’in-lima komete serbisu ilegál
Jornalista: Abílio Elo Nini
Editór: Evaristo Soares Martins
