SAÚDE

Janeiru-maiu: Servisu Saúde Aileu rejista moras IRA 15.914

Janeiru-maiu: Servisu Saúde Aileu rejista moras IRA 15.914

infesaun vias respiratóriu aguda (IRA). Ilustrasaun/Google

DILI, 07 juñu 2024 (TATOLI)–Diretór Sentru Saúde Aileu (SSA), SSA, João de Jesus, hateten iha janeitu to’o maiu 2024 ne’e, servisu saúde munisípiu Aileu rejista moras Infesaun Vias Respiratóriu Aguda (IRA) hamutuk 15.914.

Notísia Relevante: Janeiru-marsu: Servisu Saúde Dili rejista moras IRA 42.143

“Husi totál númeru IRA ne’e kompostu husi feto hamutuk ema na’in-8.868 no mane hamutuk ema na’in-7.046,” Diretór SSA, João de Jesus, hateten ba Agência Tatoli, liuhosi telefónika.

Entretantu, Diretór Servisu Saúde Manatuto (SSM), Arfim Pereira Cárceres, hateten moras IRA iha trimestre dahuluk iha tinan ida-ne’e nian mak serbisu saúde munisípiu Manatuto rejista besik 5.000.

“Ita kompara iha trimestre dahuluk (janeiru-marsu) iha tinan ne’e, ita iha 4.041 moras IRA,” Diretór SSM, Arfim Pereira Cárceres, ba Agência Tatoli liuhosi telefónika.

Aleinde ne’e, nia mós aprezenta moras sira seluk iha primeiru trimestre mak kazu ba moras sira hanesan tee-been agudu 907, pneumonia 201, asidente tráfika 142, moras kulit 392, scabies 229, tebeen ho ran 140 no vasisela 15 kazu.

Nia dehan, moras IRA iha tinan kotuk nian ne’e serbisu saúde Manatuto ne’e rejista totál pasiente hamutuk 55.540.

Moras Infesaun Vias Respiratória Aguda (IRA)

Moras infesaun Vias Respiratóriu Aguda (IRA) mak infesaun viral (infeksaun ne’ebé kauza hosi virus) ne’ebé akontese iha ita-nia dalan iis nian. Bainhira ita dada iis anin sei halai tuir ita-nia dalan iis nian antes to’o iha pulmaun. Normalmente ita-nia dalan iis hahú ka forma hosi Inus, Kavidade nasal (inus kuak), faringe no laringe (kanál rua ne’ebé nia lokalizasaun iha kakorok).

Anin sei pasa hosi dalan-isin hirak ne’e molok tama ba traqueia no pulmaun. Infesaun ne’ebé akontese iha ita-nia dalan-iis sei provoka ka halo ita sente susar no la konfortavél bainhira dada iis, no nu’udar konsekuénsia sei halo ita-nia isin falta anin hodi hala’o nia funsaun ho di’ak. Moras ida-ne’e fasil tebes da’et no fasil tebes atu kura.

Kauza hosi Infesaun Vias Respiratória Aguda

Moras IRA kauza hosi virus no bakteria ne’ebé invade diretamente ita-nia dalan iis liuhosi matan, inus no ibun. Virus sira-ne’ebé hamosu moras ne’e mak hanesan Rhinovirus, Coronavirus, Virus parainfluenza, no adenovirus.

Fatór sira-ne’ebé kontribui hetan moras IRA

Fatór sira-ne’ebé kontribui atu hetan moras IRA mak hanesan (1) Relasaun ho Individu; Laabarik sira-ne’ebé la simu imunizasaun, bebé ne’ebé la hetan susu hosi inan, bebé no labarik sira menór ho idade tinan ida, sistema imunolojia fraku (daya tahan tubuh lemah), má nutrisaun, moras krónika, ijiéne pesoál ne’ebé la di’ak.

Relasiona ho Ambiente mak; Mudansa temperatura ambientál, poluisaun (rai-rahun), asinamentu (kepadatan, overcrowding), falta ventilasaun iha uma, fumadór barak (su’ar hosi sigaru bele hasa’e insidénsia ba moras ne’e) no ahi-su’ar.

Transmisaun

Moras Infesaun Vias Respiratóriu Aguda (IRA) transmite ka da’et liuhosi kontaktu direta (koali’a, fani, kabeen) ho ema ne’ebé hetan tiha ona moras ne’e.

Sintóma

Moras Infesaun Vias Respiratóriu Aguda (IRA) sei hatudu sinál no sintóma hanesan; Inus been turu no suli ka inus metin, me’ar (me’ar maran), isin kolen ka baruk, isin manas (dalaruma), garganta moras, no ulun moras (dalaruma).

Tratamentu

Tratamentu ba iha moras infesaun vias respiratóriu aguda (IRA) iha oin rua (2) mak tratamentu medikamentoza (ho aimoruk) no tratamentu non-medikamentosa (la uza ai-moruk).

Tratamentu medikamentoza (ho aimoruk): médiku sira mak sei fó aimoruk bainhira ita ba hala’o konsulta iha sentru saúde ka iha ospitál. Tratamentu non-medikamentoza (tratamentu la ho ai-moruk): tratamentu ne’ebé prátiku no ita bela halo hanesan suas ho bee manas nia su’ar, hemu bee no jus barak, deskansa barak no selu-seluk tan.

Prevensaun

Moras infesaun vias respiratóriu fasil tebes atu kona ema maibé fasil tebes mós atu prevene, sé ita iha konsiénsa no kultura saudavel. Asaun ka hahalok sira-ne’ebé ita tenke halo hodi prevene moras ne’e mak hanesan; fase liman ho sabaun, hadook aan hosi ahi-su’ar no rai-rahun, taka inus no ibun bainhira fanin ka me’ar, susu-been ekskluzivu ba bebé foin moris to’o fulan neen (6), labele fuma besik, halo vasinasaun, no kuidadu ijiéne pesoál.

Jornalista : Jesuína Xavier

Editór        : Cancio Ximenes

iklan
iklan

Leave a Reply

iklan
error: Content is protected !!