iklan

EDUKASAUN

Konstrusaun altar iha Tasi-Tolu atinje ona 70%

Konstrusaun altar iha Tasi-Tolu atinje ona 70%

Progresu konstrusaun altar iha Tasi-Tolu, Dili, kuarta (07 juñu 2024). Imajen Tatoli/Francisco Sony.

DILI, 07 juñu 2024 (TATOLI)–Konstrusaun altar no prasa vatikanu iha Tasi-Tolu ne’ebé konstrui husi empreza Karya Timor ho medida diametru 50, altar iha metru 17×35 ne’ebé gasta orsamentu millaun $1 atinje ona 70%, no sei termina iha fulan-agostu.

Notísia Relevante: Delegasaun vatikanu apresia preparasaun Igreja-Estadu TL atu simu Papa Francisco

“Empreza halo ona lantai no eskada hanesan baze importante ba iha kontrusaun, no harii mós uma no kazadebañu ba Papa Francisco no padre sira hotu iha altar ne’e nia sorin,” Tékniku Ajénsia Dezenvolvimentu Nasionál (ADN), Francisco Jerónimo, hateten ba Agência Tatoli liuhusi telefónika, kinta ne’e.

Progresu konstrusaun altar iha Tasi-Tolu, Dili, kuarta (07 juñu 2024). Imajen Tatoli/Francisco Sony.

Nia hatutan, empreza presiza kompleta konstrusaun sira balun hodi konklui obras ne’e hodi bele prienxe dezeñu.

“Iha fasilidade sira seluk balun mak seidauk mak hanesan uma kakuluk ba altar, sei halo pemantapan rai hodi chor altar nian no pavimentu iha okos no fasilidade tuir igreja nia nesesidade ne’e mak seidauk, maibé iha hela prosesu,” nia dehan.

Altar Tasi-Tolu sei sai hanesan muzeu

Antes ne’e, Ministériu Agrikultura, Pekuária, Peska no Floresta (MAPPF) oferese ai-naa lolon 10 ho naruk metru haat (4) atu konstrui altar ba selebrasaun misa ne’ebé sei prezide husi Papa Francisco iha Tasi-Tolu.

“Ne’e pedidu husi Primeiru-Ministru, Kay Rala Xanana Gusmão, ne’ebé hakarak altar ba Amu Papa ne’e tenke iha kualidade no sei sai fatin ida ba turizmu relijiozu iha future,” Ministru Agrikultura, Pekuária, Peska no Floresta, Marcos da Cruz, dehan iha Comoro, tersa (04 juñu 2024) ne’e.

Governante ne’e esplika, loloos ne’e atu tau ai-teka maibé xefe Governu hakarak iha ai orijen ne’ebé ho kualidade, tanba ne’e maka uza ai-naa no bainhira Papa Francisco fila bele tau ai ne’e iha muzeu no ne’e sai mós istória.

“Bainhira iha prosesu tesi ai-naa ne’e, mosu problema uitoan tanba guarda florestál sira iha Liquiçá, área Bubleu, fatin ai-naa moris ba ne’e la konkorda atu tesi tanba sira la hetan karta lisensa ruma husi Ministériu Agrikultura, maibé pedidu ida ne’e xefe Governu maka husu, tanba ne’e presiza apoia hodi halo buat ruma ho kualidade atu simu Amu Papa ninia prezensa iha Tasi-Tolu ne’e”, Marcos da Cruz esplika.

Reprezentante Vatikanu iha Timor-Leste, Núnsiu Apostóliku, Monseñor Marco Sprizzi, hateten konstrusaun altar santu ba vizita Papa Francisco ne´ebé konstrui iha Tasi-Tolu sei husik hela hanesan muzeu ba timóroan no turista sira.

Monseñor hateten, konstrusaun palku boot iha Tasi-Tolu bele sai permanente ne’e, hafoin liutiha Papa Francisco nia vizita ne´e, iha loron boot ka loron nasionál ruma sei bele utiliza ba atividade sira seluk.

“Ho investimentu hotu-hotu ho okaziaun ba vizita Papa Francisco nian, Governu halo ba dezenvolvimentu Timor enjerál. Kritika hotu-hotu la fó konta katak buat hotu sei hela ba timoroan, la’ós provizória,” Monseñor Marco Sprizzi hateten ba jornalista sira iha serimónia inaugurasaun Sede Konferénsia Episkopál Timorense (CET, sigla portugés) iha Bidau, sesta (17 maiu 2024).

Progresu konstrusaun altar iha Tasi-Tolu, Dili, kuarta (07 juñu 2024). Imajen Tatoli/Francisco Sony.

Antes ne’e, Jerente Jerál Empreza Karya Timor, Nasrol Naslin, kompromete ninia parte sei finaliza projetu konstrusaun altar misa Sua Santidade Amu Papa Francisco iha Tasi-Tolu, durante fulan haat nia laran.

Nia dehan, parte kompañia sei kontinua koordena ho Ajénsia Dezenvolvimentu Nasionál (ADN) hodi observa no fiskaliza durante prosesu konstrusaun nune’e bele garante obra ne’e ho kualidade di’ak tuir Planta no kadernu Enkargu ka BoQ ne’ebé mak iha.

Diretór Ezekutivu Ajénsia Dezenvolvimentu Nasionál, Institutu Públiku (ADN, I.P), Rui Lourenço da Costa, hateten kosntrusaun altar ne’e reprezenta prasa Vatikanu nian no mós relasaun bilaterál entre Santa Sé ho Vatikanu.

Aleinde ne’e, konstrusaun ba altar misa foun ne’e kompañia sei halo mós reabilitasaun ba altar antiga ne’ebé mak Amu Papa João Paulo II uza hodi selebra misa iha 12 outubru 1989 bainhira hala’o vizita mai Timor-Leste.

Governu liuhosi Konsellu Ministru aprova orsamentu $12 millaun ba preparasaun obra fízika hanesan reabilitasaun estrada, konstrusaun Altar ba misa Amu Papa nian iha Tasi-Tolu, Katedrál Dili, igreja Motael, Sentru Konvensaun Dili no sítiu istóriku no fatin turizmu relijioza Cristo Rei, Fatucama, Dili.

Notísia Relevante: Papa Francisco sei vizita Timor-Leste iha 09-11 setembru 2024

Jornalista : Jesuína Xavier

Editór       : Cancio Ximenes

iklan
iklan

Leave a Reply

iklan
error: Content is protected !!