EKONOMIA, BOBONARO, HEADLINE, MUNISÍPIU

Movimentasaun karreta-motorizada iha estrada Zulo-il Lolotoe paradu

Movimentasaun karreta-motorizada iha estrada Zulo-il Lolotoe paradu

Kondisaun atuál estrada iha área Zulo-il, suku Lontas, postu administrativu Loloto'e, munisípiu Bobonaro. Imajen espesiál

BOBONARO, 07 juñu 2024 (TATOLI)-Movimentu transporte públiku no privada husi postu administrativu Lolotoe ba postu administrativu Maliana no Bobonaro dadaun ne’e paradu, tanba estrada iha área Zulo-il, suku Lontas, hetan estragus totál afeta husi dezastre naturál hafoin akontese udan boot durante semana ne’e.

Asuntu ne’e relata husi Administradór postu administrativu Lolotoe, Munisípiu Bobonaro, Sebastião Amarál, ba Jornalista sira iha salaun edifísiu administrasaun munisipál Bobonaro, sesta ne’e.

Administradór postu administrativu Lolotoe, Sebastiao Amarál. Imajen Tatoli/Sérgio da Cruz.

Administradór postu administrativu Loloto’e, hateten kondisaun estrada ne’e difikulta komunidade sira lori produtu lokál asesu ba merkadu inklui difikulta ambulánsia atu transporta pasiente ho urjente husi Lolotoe Vila ba Maliana.

Notisia relevante: PAM Bobonaro nota presiza intervensaun urjénsia ba estrada Zulo-il Lolotoe

“Kondisaun estrada ne’e foin lalais sei di’ak oituan, agora motór mós labele liu ona, atu liu mós ema na’in-haat mak hulan, motór boot ne’e selu $5 no motór ki’ik ne’e $2 ou $3, kareta liu la di’ak aat liután, tanba bronjong sira ne’e tún hotu,” nia hateten.

Autoridade postu Lolotoe, halo ona enkontru ho lia-na’in no xefe suku hitu atu halo serimónia kulturál hodi satán estrada ne’e husi dezastre naturál.

Administradór postu ne’e hatama ona pedidu ba Prezidente Autoridade Munisipál Bobonaro, Alexandrino Pires, atu buka solusaun hodi rezolve problema ne’e.

Nia afirma, problema ne’e afeta tebes ba atividade ekonomia, sosiál liuliu ajuda umanitaria ne’ebé parseiru sira atu apoia ba komunidade Lolotoe.

Nia dehan, iha tempu badak ONG ida sei apoia kbiit laek sira ho totál 602, sasán ne’ebé atu lori ba foos tonelada 15, koto ho mina hamutuk tonelada 19, sasán ne’e tenke lori ba postu, entaun estrada aat ne’e araska, atu ba simu iha Lontas mós la di’ak.

Diretór Servisu Obra Públika Munisípiu Bobonaro, Marcelino Godinho, informa pedidu normaliza ne’ebé antes ne’e submete ba nasionál hetan ona aprovasaun no despaxu husi Prezidente Institutu Jestaun Ekipamentu Apoia Dezenvolvimentu Infraestrutura, Institutu Públiku (IGEADI,I.P) iha fulan kotuk, maibé to’o agora Brigada Maria-Tapo seidauk mobiliza ekipamentu pezadu ba fatin lokalizasaun.

“IGEADI rasik ba ha’u nia Office dehan despaxu ne’e tún tiha ona, maibé sira razaun seidauk mobiliza ba ne’e tanba sei responde hela servisu ida iha Bobonaro depois mak sira mobiliza ekipamentu ba, maibé ninia loron atu ba ne’e mak seidauk hatene,” nia hateten.

Nia rekomenda ba IGEADI,IP liuliu Brigada Maria-Tapo atu halo intervensaun emerjénsia hodi fasilita movimentasaun públiku.

“Agora ita-nia komunidade iha ne’ebá labele asesu ona, tanba agora motór de’it mós labele liu. Ida-ne’e sai preokupaaaun ba komunidade sira iha Lolotoe,” nia katak.

Alende estrada iha Zulo-Il kondisaun estrada iha área suku Opa no Lupál, postu administrativu Lolotoe liga ba munisipiu Covalima mós kotu totál hafoin akontese udan iha semana ne’e.

Enkuantu postu administrativu Lolotoe iha aldeia 20 suku hitu ho totál populasaun 7,695 no xefe fámilia 1,591.

Notísia relevante: Líder komunitária husu Governu rezolve kondisaun estrada Zuloil-Lolotoe

Jornalista: Sérgio da Cruz
Editór: Evaristo Soares Martins

iklan
iklan

Leave a Reply

iklan
error: Content is protected !!